БОРЈАН ЈОВАНОВСКИ
Советот на министрите за надворешни работи на ЕУ вчера ја започна дебатата околу иднината на односите со Русија. Дебатата , според дипломатски извори се води според нацрт текстот на новата стратегија за односите со Москва во која се дефинирани таканаречени „насоки според кои ќе се дефинира оваа нова стратегија“. Една од нив се нарекува „подршка на соседите на ЕУ преку политиките на проширувањето“ и се однесува на земјите од Западниот Балкан.
Руската инвазија на Украина и промената на сегашниот геополитички пејзаж веќе предизвикаа заживување на процесот на проширување на ЕУ по речиси една деценија стагнација. „Тоа, исто така, доведе до сознание дека стратешкиот интерес на ЕУ за стабилна и безбедна средина во нејзиното блиско соседство мора да оди подалеку од размислувањето која ќе биде следната членка“, се вели во нацрт стратегијата врз чија основа се водеше вчерашната дебата во Советот.
Во новата стратегија предвидува „меѓународно изолирање на Русија, наметнување и спроведување рестриктивни мерки против Русија и спречување на нивно заобиколување, со цел да се спречи таа да води војна“.
Една од „насоките“ e „обезбедување одговорност за сторителите и соучесниците одговорни за кршење на меѓународното право и воени злосторства извршени во Украина“.
Според нацрт-принципите, ова би вклучувало и „соочување со глобалните последици од војната“.
„Русија, користејќи храна како оружје во војната против Украина, е единствено одговорна за глобалната криза со безбедноста на храната што ја предизвика“, се вели во нацрт-текстот.
Нацртот, исто така, ги повика земјите-членки „тесно да соработуваат со партнерите ширум светот и со сојузниците во НАТО за да го одбранат и зајакнат меѓународниот поредок заснован на правила“.
Според нацртот, „сфери на влијание немаат место во 21 век и не можат да бидат дел од идниот европски безбедносен поредок“.