Ако за некого може да се каже дека беше шампион во неговата професија, тоа беше докторот Јовица Угриновски. Македонија се гордееше со својот неврохирург од класа на светски професионалци во оваа важна област. Угриновски како најголем стручњак беше повикан на операционата маса кога требаше да се спасува животот на претседателот Киро Глигоров по атентатот што му беше извршен во 1995 година.
„Ако сакате мртов претседател, чекајте странски доктори“, им рекол тој тогаш на сите од државниот врв кои во паника размислувале како да постапат и какви одлуки да донесат во врска со тешко ранетиот шеф на државата. Сложениот неврохируршки оперативен зафат Угриновски го изведе со телефонска поддршка од француски колеги.
Угриновски специјализацијата по неврохирургија ја завршил во Скопје – што е убаво потсетување за стандардите кои некогаш владееле во овдешната медицина и медицинска наука. Завршил и три постдипломски курсеви по неврохирургија во Монтпелје, Франција, Манчестер, Велика Британија и Братислава, Словачка. Извесен период како неврохирург работел и во Либија.
Доктор Јовица Угриновски Има голем придонес во воведувањето на методот на премостување на крвните садови во мозокот.
Но тоа е премалку за да се опише неговиот лекарски опус и довербата што ја уживаше кај пациентите. Тоа не може да го видите ниту во неговата биографија, бидејќи спротивно на денешните биографии што си ги пишуваат стручњаци од разни области, неговиот опис на школување и на кариерата е едноставен, краток и без фалби за постигнатите успеси.
Угриновски е и основач на приватната медицинска установа Неуромедика, на чија прослава на 30 годишнината од отворањето годинава му беше доделена специјална награда за животно дело.
По пензионирањето се оддаде на неговата страст – алпинизам, спорт кој го практикуваат само најупорните и најиздржливите, но кој за жал не му донесе долговечност како што тврди медицинската и спортската наука.
Познатиот доктор почина на 77 годишна возраст, како што се наведува во објавата на Неуромедика, по долготрајно боледување. Од него денес на социјалните мрежи се простуваат илјадници пациенти на кои тој им донел здравје и подолг живот. Тие сведочат за неговите виртуозни потфати во мозокот како најсложен дел на медицината, што е реткост не само во Македонија туку и во другите земји.
С.К.