Еден ден по одлуката на Германија и САД да направат исчекор во воената помош и да испратат десетици борбени тенкови во Украина, големи експлозии го потресоа главниот град Кијив рано наутро на 26 јануари.
Агенциските тикери и пораките на социјалните и комуникациските платформи од украинските власти се преполни со вести за разорниот напад, но и за извонредниот огнен одговор на одбраната. Само во првиот бран на воздушни напади во мугрите, пред разденување, руските бомбардери истрелале околу 30 проектили врз цивилните домови и инфраструктура низ целата земја.
Украинската противвоздушна одбрана собори 24 дроновите-камикази со иранско потекло од типот Shahed 131 и 136. Украинските извори наведуваат дека само над Кијив биле уништени 15 крстосувачки ракети. Само до пладнето на 26 јануари, украинската одбрана уништи 47 од 55 крстосувачки ракети колку што Русија лансираше од раните утрински часови.
За жал, 8 ракети ги погодија своите цели – цивили, нивните домови и инфраструктурата што обезбедува основни услови за живот.
Русија, соочена со огромна низа проблеми во своето вооружување, импровизира постојано, но тие обиди резултираат со крајно непрецизни и несоодветни решенија за надополнување на рускиот агресорски арсенал. За жал, тие прилагодувања имаат разорни последици. Русите стрелаат со сѐ што ќе им се најде во депоата со оружје и муниција. Во последните неколку месеци, развија варијанта од антитенковските „Корнет“ проектили. Се работи за т.н. X-BPLA проектили чиј предок е „Корнет“, кои сега се монтираат на дроновите и бомбардерите.
Меѓу 55-те ракети и проектили лансирани претпладнето врз Украина, спаѓаат и Kh-47M2 Kinzhal кои имаат дострел од 2.000 километри и наменети се за уништување на воени бродови и 3M-54 Kalibr, исто така наменети за борба против воени бродови и подморници, со дострел од околу 200 километри. Во нападите се ангажирани и авионите пресретнувачи од типот MiG-31.
„Експлозии во Кијив – останете во вашите засолништа“, објави Антон Герашенко, висок функционер во Министерството за внатрешни работи, на Телеграм.
Градоначалникот на Кијив, Виталиј Кличко, подоцна изјави дека едно лице загинало, а две се ранети кога проектил погодил зграда во јужниот дел на градот. Три лица загинаа во рускиот напад врз критичната инфраструктура во Запорижја, соопшти државното обвинителство на Телеграм, а има извештаи за ракетни напади во областа Виницја во западна Украина и во околината на Одеса.
Дмитро Кулеба, министерот за надворешни работи на Украина, објави дека ракетните удари дошле еден ден откако агенцијата за култура на Обединетите нации, УНЕСКО, ја додаде Одеса на списокот на светско наследство во опасност.
Дополнувањето на листата му дава на градот „пристап до засилена техничка и финансиска меѓународна помош“, соопшти УНЕСКО.
„Украина може да го побара тоа, за да обезбеди заштита на имотот и, доколку е потребно, да помогне во реконструкцијата, доколку биде нападната“, се вели во соопштението на УНЕСКО.
Минатата недела, руските воздухопловни сили спроведоа вежби во Белорусија. Очигледно, вежбите биле насочени за напад на цивилите и сеење терор низ Украина.
Џ. Дерала