„Ние сме во фаза на билатерален скрининг, којшто успешно се одвива и којшто треба да го завршиме оваа година. Дали ќе ги отвориме поглавјата во рамки на преговарачкиот процес е нешто што зависи од нас. Во оваа, 2023 година, ја имаме најголемата шанса досега да ги забрзаме преговорите и до 2030-та година, Северна Македонија да стане членка на Европската Унија“, рече премиерот Ковачевски на годишната конференција „Година на нови можности“.
Тој рече дека преговорите се почнати со целосно заштитен македонски јазик, а со тоа и македонски идентитет и тоа е веќе кристално јасно за сите надвор, а рече дека се надева и за сите добронамерни дома.
„Почитувањето, вреднувањето, зајакнувањето и унапредувањето на македонскиот јазик и македонскиот идентитет зависат најмногу од нас самите, тука дома. Нашата историја, традиција и јазик кои сме ги наследиле од нашите предци, и за што е дадена вековна огромна жртва, никој и никогаш не може да го земе. Имаме своја македонска историја, култура, традиција по кои што сме признаени во Европа и светот како посебен народ и посебна држава“, рече Ковачевски.
Во однос на критиките за судството, тој, пак, рече дека извршната власт направи се за ефикасно судство.
„Во рамки на заложбите, како извршна власт, направивме сè што зависи од нас за ефикасно правосудство, по донесените закони – и 5 основни судови, конкретно во: Кавадарци, Струмица, Штип и Кривичниот и Граѓанскиот суд во Скопје се опремени со современа опрема, како дел од планот за дигитализација во правосудството“, рече шефот на Владата.
Тој додаде дека од ноември минатата година во функција е и најголемата дигитална судница во државата, во Идризово.
„Во услови кога сите погледи се насочени кон борбата со криминалот и корупцијата како предизвик во национални и регионални рамки, стеснет е просторот за изговори кога станува збор за ефикасното и професионално постапување на надлежните органи. И секој има обврска да испорача резултати за тоа за што е платен од граѓаните“, рече Ковачевски.
Премиерот се осврна и на малцинските права во земјава. „Северна Македонија им гарантира и им овозможува на сите народи и сите граѓани кои живеат на ова тло и кои ја сметаат земјава за дом, непречено да си ги остварат своите права. И тоа сме го покажале и докажале на дело многу пати досега. Ние сме горди на нашето мултикултурно општество, горди сме што сме Европа во мало. Така било, така е, така и ќе биде“, рече Ковачевски.
Тој додаде дека во нашата држава живеат рамноправно граѓани од различни етнички заедници со коишто успешно градиме општество за сите, и рече дека тоа е пример за соживот.
Ковачевски смета и дека во Бугарија се подготвуваат за нови парламентарни избори и „поединци преку националистичка и популистичка реторика се обидуваат да добијат видливост и гласност.
„Има веројатно и обиди да се наштети, не само на билатералните односи, туку и на единството во Европа, на кое што посебно упати војната во Украина, а кое што треба да се обезбеди преку натамошното проширување на Унијата. Затоа, сите ќе си ја гледаме својата работа. Наша работа е да ги штитиме националниот идентитет, стабилноста и безбедноста на државата и да го овозможиме напредокот“, рече Ковачевски на конференцијата „Година на нови можности“ што во организација на Владата се одржува денеска и утре.
Р.Н.