Утрово МВР издаде соопштение во врска со синоќешното двојно убиство во Старата скопска чаршија. Во соопштението освен вообичаените датум и локација се прецизира дека убиствата се случиле во угостителски објект на улица „Самоилова“ во Скопје.
„Пет лица облечени во црна облека со фантомки од огнено оружје пукале кон Ј.К. (37) и Е.И. (28), кои починале на местото на настанот, и кон А.Т.(34) од Скопје, кој се здобил со повреди и бил пренесен во Градската општа болница „Св. Наум Охридски“ за укажување лекарска помош. Известен е јавен обвинител, кој излезе на лице место и по чија наредба телата се дадени на обдукција. Околу 20.30 часот било опожарено возило „ауди а6“ на патот кон Горно Оризари. По насоки од јавен обвинител, извршени се службени разговори со повеќе лица и се преземаат соодветни мерки и активности за расчистување на убиството“, се вели во соопштението.
Во меѓувреме остануваат непознати мотивите како и извршителите на ова злосторство чиј епилог е мафијашка егзекуција на двајца млади луѓе. Ранетиот, како што се дознава, е надвор од животна опасност и е пуштен на домашно лекување.
Министерството за внатрешни работи и Јавното обвинителство веднаш излегоа на терен, а досега во јавноста излегоа само со првични информации за настанот.
„Фиксирани се траги на самото место, а јавниот обвинител ги издава сите потребни наредби и насоки со цел да се обезбедат докази кои ќе помогнат за расчистување на настанот и за откривање на идентитетот на сторителите“, рекоа доцна синоќа од Обвинителството.
Според неофицијални информации, сторителите веднаш по убиството избегале со автомобил „ауди 6“, кој потоа бил пронајден запален, што утрово е потврдено и од полицијата.
Неофицијалните информации, исто така, го открија и идентитетот на убиените – Јетон Кривањева и Енес Исени. Двајцата наводно се наоѓале на вториот кат од угостителскиот објект каде што биле пронајдени од убијците.
За инциденти со кои се поврзува Кривањева, како што објавија и синоќа дел од медиумите, во јавноста се пишувало и претходно. Тој наводно бил дел од групата кон која се пукаше во вооружен напад во хотелот „Александар палас“ во 2019 година.
За третиот ранет, пак, доцна синоќа информации соопштија од Универзитетската клиника за хируршки болести „Свети Наум Охридски“ (старата Градска болница). Според изјавата оттаму, тој со приватно возило бил донесен во болницата во 20:15 часот и имал две рани. Едната, помала, на левото стапало, додека поголема имал на десната потколеница. Раните му биле обработени, направени биле потребните снимања и преврски, поставена му е имобилизација, по што е пуштен на домашно лекување.
Р.Н.