Со 41 глас „за“, 14 гласа „против“ и 1 „воздржан“, Советот на бугарскиот главен град Софија го одобри отстранувањето на Споменикот на советската армија, јави БГНЕС. Одлуката беше усвоена со гласовите на ГЕРБ-СДС, ДБ, Патриоти за Софија и независните општински советници. Групата на СП скандирала за оставка на претседателот на Советот, по што ја напуштиле салата.
Отстранувањето на споменикот ја вжешти атмосферата не само во Софискиот совет, туку и пред зградата на општината, каде што се собраа неговите бранители.
„Имаме јасен став, денешниот чин е пред се политички. Го поддржуваме предлогот на ДБ за преместување на споменикот на Советската армија“, рекол Георги Георгиев, претседател на Советот.
Предлогот што тој го дал е на местото на советскиот споменик да биде поставена информативна табла која ќе ја отсликува „историската вистина“, како што ќе ја презентираат специјалисти, историчари, професори во БАН и на софискиот универзитет.
„Споменикот на Советската армија, според нас, треба да се отстрани, бидејќи националната држава не треба да толерира споменик на туѓа држава“, изјавил Карлос Контрера, општински советник од групата Патриоти за Софија.
„Извештајот за отстранување на споменикот на Советската армија се чека три години во општинскиот совет, факт е дека до пред неколку недели го поддржувавме само ние од ВМРО. Предлагаме ова место да се искористи со создавање на споменик на основачите на бугарската држава, бидејќи за наш срам немаме споменик за нив“, изјавил Контрера.
Бранителите на споменикот на советската армија ја нападнаа општинската зграда на главниот град со јајца и црвена боја. Тие денеска се собраа пред Споменикот во знак на протест во негова одбрана, спротивставувајќи се на негово демонтирање. Толпата вееше руски и црвени знамиња.