Published: Friday, March 10, 2023 15:32
Премиерот Димитар Ковачевски, денеска, заедно со министерот за економија, Крешник Бектеши, одржаа прес-конференција, на која што ги соопштија најновите владини одлуки во врска со замрзнување и намалување на цените на тестенините и млечните производи.
„Се замрзнува, односно намалува цената на тестенините, кое намалување се предлага да биде за 15 отсто, на цената која се применува во трговијата на мало на 1 март 2023 година, односно во просек за околу 8,00 – 9,00 денари. Се работи за тестенини, односно за макарони и шпагети“, рече Ковачевски.
Покрај овие продукти цената ќе биде замрзната и на млекото, урдата, сирењето, кашкавалот, павлаката, киселото млеко и јогуртот. Министерот за економија, Крешник Бектеши рече дека цените на овие производи се намалуваат за 10 отсто. Одлуката за замрзнувањата ќе се применува од 16 март до 31 мај 2023.
„Во делот на тестенините донесовме одлука за укинување на царината. Само со укинување на царината кај тестенините според пресметките нивната цена се намалува за 8-9 денари во просек во малопродажба. Очекуваме намалувањето да биде и поголемо“, рече Бектеши.
Тој најави дека е можно намалување на цените и на други производи.
„Ќе ни останат шеќерот, јајцата од кокошка и македонски ориз, за кои, следната недела ќе се направат анализи. Можно е да бидат замрзнати и овие цени.
Идната недела ќе се направат анализи и ќе се утврди дали ќе бидат замрзнати цените и на шеќерот, јацата и оризот“, рече министерот, најавувајќи дека цените на овие производи најверојатно ќе се замрзнат ако производителите не ги намалат.