Германската министерка за надворешни работи Аналена Бербок во Скопје се сретна со делегација на ВМРО-ДПМНЕ во резиденцијата на германскиот амбасадор.
„Дојче веле“ објави фотографии и видео од средбата на која се гледа дека Мицкоски во германската резиденција на средбата пристигнал во друштво на тројца потпретседатели на партијата: Александар Николоски, Тимчо Муцунски и Гордана Димитриевска-Кочоск, како и пратеникот Антонијо Милошоски кој е претседател на собраниската Комисија за надворешна политика.
Бербок денеска е во официјална посета на земјава која за започна со средба со министерот за надворешни работи Бујар Османи. Нејзиното доаѓањето е во период кога земјава го спроведува скрининг-процесот со ЕУ и кога треба да се започне процесот на уставни измени со кои Бугарите и други заедници ќе бидат додадени во Уставот.
На прес-конференција со Османи таа денеска порача дека договорената промена на Уставот не смее да стане политичко јаболко на раздорот во натпреварот за популарност во анкетите или натпреварот во тоа која партија на крајот на изборите би можела да има некаква предност.
„Сега кога станува збор за спроведување на договореното и кога навистина мора да се промени Уставот, можам само да ве охрабрам, не само како претставник на Владата, туку до сите демократски партии и учесници им се обраќам: искористете ги сите расположливи средства за процесот да може да продолжи во следните месеци. Да не се случи да не успеете во овој клучен момент“, рече Бербок.