Американското Министерство за одбрана почна да ги подготвува американските вселенски сили за можен иден конфликт со Русија и Кина во вселената, објави Волстрит журнал. Одлуката доаѓа во време кога Русија и Кина распоредуваат ласери и ракети кои би можеле да ги оневозможат сателитите и да ја нарушат цивилната комуникација.
Во март, Белата куќа предложи зголемување на годишниот буџет на вселенските сили на 30 милијарди долари, што е рекордна сума. Сумата предложена од американската администрација е речиси 4 милијарди долари повеќе од буџетот во 2021 година. Белата куќа, исто така, предложи зголемување на средствата за воздухопловните сили и морнарицата.
Зголемувањето на трошоците на вселенските сили ќе доведе до зголемување на бројот на воениот персонал на 16.000. За војниците ќе бидат купени специјални симулатори за обука за борба во вселената, а ќе бидат обучени и за ракување со сателити, копнена комуникација и сензорска опрема и системи за оружје.
Минатата година, САД ја идентификуваа Кина како најголема безбедносна закана во својата одбранбена безбедносна стратегија. Ова се должи, меѓу другото, на развојот на ласери и копнени проектили кои можат да удрат сателити. Русија, исто така, беше наведена во документот како голема закана за безбедноста.