Долгогодишниот гитарист на шведската поп група АББА, Ласе Веландер, почина по кратка битка со тешката болест.
„Беше фантастичен музичар и скромен како ретко кој друг, но пред се прекрасен сопруг, брат, татко и дедо“, се вели во објавата на неговото семејство на социјалните мрежи, пренесува британски Мирор.
Веландер одигра голема улога во повеќето студиски снимки и турнеи на шведскиот бенд во текот на 70-тите и 80-тите години, а беше вклучен и во создавањето на последниот албум на групата, Voyage, кој беше објавен во 2021 година.
Тој свиреше на вкупно 24 студиски снимки на бендот, вклучувајќи ги и сите осум нивни студиски албуми, и учествуваше на нивната последна турнеја помеѓу 1979 и 1980 година, на која бендот настапуваше на целосно распродадени концерти.
Покрај АББА, тој свиреше со голем број други бендови и уметници од Шведска, а исто така го издаде својот деби албум во 1981 година, пред да продуцира и издаде уште 11 во текот на годините.
Во 2014 година, како член на АББА, Веландер беше примен во шведската музичка куќа на славните.