Published: Tuesday, May 16, 2023 12:45
Вработените во Управата за јавни приходи (УЈП) во Скопје и во регионалните канцеларии излегоа на протест за повисоки плати согласно Колективниот договор. Протестот траеше од 10 до 11:30 часот, а претседателот на синдикалната организација во регионалната подружница на УЈП-Штип од синдикатот „Солидарност“, Сашко Велковски рече дека барањето на вработените е платите да се зголемат за 30 отсто.
„Овој прекин на работа е само еден жолт картон на раководството во Министерството за финансии кое и покрај преговорите што ги имавме во изминатиот период, не ги одобри нашите барања што ни следуваат согласно Закон“, рече Велковски.
Тој посочува дека трошоците за живот континуирано растат, а платите на вработените во УЈП се исти со години. Доколку нема зголемување, вели, вработените се подготвени и за порадикални чекори, односно ќе продолжат со протести и генерален штрајк.