Горан Јешиќ, потпретседателот на Владата на Војводина и покраински секретар за земјоделство, изјави дека на своите деца не им дозволува да пијат млеко!
За српските медиуми рече дека млекото не е исправно и дека резултатите од новата анализа покажале уште поголемо присуство на афлатоксин во млекото.
Јешиќ тврди дека нивото на афлатоксин е зголемено за седум пати и дека официјалните резултати ќе бидат објавени за 3-4 дена.
Стотина млекопроизводители вчера во знак на револт го истурија млекото пред зградата на Владата на Војводина. Според нив ова е уште еден удар врз нив, велат „кризата е вештачки предизвиката“.
Јешиќ на новинарите им откри дека ниту една лабораторија во Србија не сакала да ги провери резултатите, па затоа примероци се испратени во Германија.
Јешиќ минатата недела прв ги објави резултатите од проверката на млекото не сакајќи да ја чека одлуката на српската влада.
За разлика од стравувањата на Јешиќ, македонските власти ја смируваат ситуацијата во Македонија.
Вчера на прес конференција директорот на Агенцијата за храна и ветеринарство во Македонија, Дејан Рунтевски, објави дека домашното млеко е сигурно и безбедно за употреба – резултатите од преку 20 испитани мостри, покажале дека концентрацијата на афлатоксин М1 секаде е под ризичното ниво.
„Македонските граѓани слободно нека го конзумираат македонското млеко, испитани се мостри на Битолска млекара, Алпи-Тетово, Здравје Радово, Струмичка млекара, Бучен Козјак и други млекари“, изјави Рунтевски.
Агенцијата информираше дека од увозните млека зголемено присуство на афлатоксин било пронајдено во неколку прaтки на Имлек, Алпско, Маестро Ниш и една пратка на Винџија.