„СДСМ е предводник на концептот 50-50% на листите за пратеници во Собранието и советници во локалната самоуправа. Во партиските органи и тела на СДСМ жените и мажите подеднакво се застапени. Учеството на жените на извршни функции во моментот е 40%, и ќе стане 50%. Работиме на Стратегија за поголемо учество на жените на градоначалнички позиции и првата цел е 30%. Усвоен е Закон за спречување и заштита од насилство врз жените и семејното насилство. Имаме Стратегија за родова еднаквост 2022-2027 која е основниот стратешки документ со кој се поставува основата за унапредување на родовата еднаквост и зајакнување на жените“, изјави Претседателот на СДСМ, Димитар Ковачевски во своето обраќање на традиционалниот Осмомартовски Марш по повод Интернационалниот ден на жената, во организација на Форумот на жени на СДСМ.
Тој даде ветување дека ќе го предложи Законот за родова еднаквост.
„Не може мажите да се кријат зад жените и да ги пуштаат жените да го предлагаат Законот за родова еднаквост. Мажите треба да застанат во прв ред и тие да го предложат Законот за родова еднаквост. Затоа, јас ви ветувам дека по 8 Мај, како претседател на Владата, првиот закон кој ќе го предложам ќе биде Закон за родова еднаквост, јас прв, мажите до мене и жените рамо до рамо со нас“, потенцираше Ковачевски.
Тој додаде дека во Буџетот во Законот за буџети, воведено е родово буџетирање, да можат жените да бидат застапени рамноправно како што не биле досега, како и дека е решено правото на користење надоместок за мајчинство, за жените земјоделки. Во 2022 година се донесе загарантиран износ на минимална плата, која сега ќе достигне 22.500 денари, што е најголема придобивка за економската независност во индустрии во кои доминантно работат жени.
„Направивме многу, но нашата работа не застанува тука. Нашата борба продолжува.Мора да ги удвоиме напорите и да изградиме општество во кое насилството врз девојки и жени е минато, а родовите стереотипи не постојат. Патот го трасиравме и од него враќање назад нема“, заклучи Ковачевски.