Оваа благородна мисија на Гризли, ќе продолжи во текот на летните месеци и тие се надеваат дека ќе се подигне свесноста за чистата животна околина и почитта кон природните богатства
Десетици волонтери, се одзваа во саботата на еколошката акција на иницијатива и во организацијана Здружението Гризли ( Grizzly ) од Скопје, за чистење на природниот резерват Јасен. Станува збор за прва, од низата акции кои ќе ги спроведе Здружението Гризли а волонтерите дополнително ги мотивираше на тој начин, што за една собрана вреќа со отпад, тие добиваат бесплатно ноќевање во туристичката локација Grizzly igloos, поточно во едно од петте иглоа сместени на Козјак со погед кон ѕвездите.
Акцијата беше спроведена кај месноста Рудина на Козјак, и собрана е голема количина на отпад. Оваа мисија на Гризли, ќе продолжи во текот на летните месеци и тие се надеваат дека ќе се подигне свесноста за чистата животна околина и почитта кон природните богатства. Освен собирање ѓубре, предвидено е, и растурање на диви депонии, означување на планинарски патеки, обуки за заштита на околината и многу други активности со кои како што велат, ќе и се оддолжиме на природата.
Јасен е природен резерват во северозападна Македонија прогласен во 1958 година, најпрвин само на планината Караџица, а во 1960 година е проширен и на Сува Гора. Опфатен е целиот кањон на реката Треска. Резерватот зафаќа површина од 24.000 ха. Највисока точка е врвот Караџица (2.473 м). Геолошката подлога е доломит со тенки слоеви од лискун. На теренот е вештачкото езеро Козјак и повремено тече реката понорница Оча и нема други води. Од флората се заштитени Viola koshaninii, Thymus oehmianus, Dianthus kapinensis и др. Од животните има дива коза, мечка, рис и др., а од птиците – лештарка (Tetrastes bonasia), белоглав мршојадец (Gyps fulvus), був (Bubo bubo) и др.
Резерватот Јасен покрива околу 32.000 квадратни метри површина најчесто со шума и патишта, како и голем број на пократки неасфалтирани патeки. Освен од лов, Јасен својата иднина ja гледа во развојот на природните ресурси и на екотуризмот. Главни активности (во зависност од сезоната) се пешачење, планински велосипедизам, кампување покрај езерата Матка и Козјак, параглајдерство, риболов, спелеологија, алпинизам.
А.Василевска