Во градот под Царевите кули течат и последните подготовки пред главната карневалска вечер која започнува вечерва. Во Струмица или како што деновиве се нарекува „градот под маски“ се е подготвено за забава до утринските часови. Низ улиците на Струмица ќе продефилираат 50 карневалски групи и 22 од странство. Една од нив се и Струмичките викинзи, кои со подготовка за учеството на годинешниов карневал започнале од месец ноември минатата година.
„Годинава нашата маска е наречена Масони. Идејата беше да се почувствуваме како најстарото братство„масони“, луѓе кои правеле добро за самите себе но и за другите, велат за НОВА“, претставници од карневалската група.
.jpg)
.jpg)
Во Струмица деновиве пристигаат и гости од другите градови ширум државата како и од странство. Некои од нив учествуваат со години , некои за прв пат. Гостите од Куманово, вечерва ќе се претставата по петти пат.
„Ние доаѓаме од Куманово од гимназијата „Гоце Делчев“, овде сме по петти пат и сме презадоволни од учеството на струмичкиот карневал. Денеска ќе се претставиме со маска насловена „Лицемери“. Сметаме дека одговара на нашето секојдневие што ни се случува во политиката, вели Радислав Радевски од Куманово.
Градот под маски пулсираше и синоќа со одржувањето на традиционалниот маскенбал во хотелот Сирус, на кој се избираше принц и принцеза, а забавата под маски траеше до раните утрински часови. Гоце и Васка Терзиеви, брачен пар од Струмица, беа избрани за принц и принцеза на маскенбалот. Тие вечерва ќе го предводат главното карневалско интернационално дефиле кое ќе стартува во 18.30 часот. За голем број од учесниците во Сириус маскенбалот претставува традиција, забава и уживање.
„Чувството секоја година е уникатно, деновите пред карневалот се еуфорични и сите не зафаќа таа карневалска треска. Годинава имаме малку покомлицирана маска, која ја нарековме „Ѕвездите од Холивуд“, изјави претставничка од карневалската група.
Според организациониот одбор на карневалот и вечерва се очекува богата и разновидна понуда на маски од домаќините, но и од големиот број гости од Србија, Црна Гора, Словенија, Хрватска, Бугарија, Турција кои ќе бидат дел од главната карневалска поворка по улиците на Струмица.
„Очекуваме спектакуларна вечер како и секоја претходна година, но се надеваме дека ќе бидеме барем малку подобри за разлика од претходната година што впрочем е и нашата девиза на карневалот, рече Цицимов.
После главната карневалска поворка, забавата ќе продолжи низ струмичките кафулиња и ресторанти, кои ќе бидат обоени во најразлични бои.