Премиерот Христијан Мицкоски изјави дека: „Нема да станеме жртва на билатерализацијата на процесот за членство во Европската унија“
Дестан Јонузи
Претседателката на Северна Македонија, Гордана Силјановска Давкова од Подгорица ја коментираше изјавата на новоизбраната еврокомесарка за проширување, Марта Кос, која се однесува на очекувањата за уставните измени во земјава.
– Имам забелешка на дикцијата на новата еврокомесарка, бидејќи кога рече – велите: ништо помалку и ништо повеќе, тоа ми личи на нешто како земи го или остави го. Тоа не е филозофија, тоа е софистицирано евромандаринство. Тоа ме плаши, бидејќи звучи како директно мешање во внатрешните работи, истакна Сиљановска Давкова на заедничката прес-конференција со нејзиниот црногорски колега, Јаков Милатовиќ.
Новата еврокомесарка за проширување, Марта Кос на 27 ноември изјави дека очекува Северна Македонија да ги направи потребните уставни измени и да ја вметне бугарската заедница во Преамбулата од Уставот.
– Тоа е нешто на коешто сметаме. Ништо помалку, ништо повеќе. Верувам дека тоа е можно и после тоа навистина да го забрзаме процесот, нагласи Кос.
На прашањето, дали после направени уставни може да се дадат гаранции дека ќе нема други блокади, Кос рече дека таа не е онаа којашто може да даде одговор на тоа прашање.
Ден подоцна претседателката Силјановска истакна дека Македонија е подготвена да направи чекори напред во процесот на уставни измени, но со одложено правно дејство.
– Ако се дозволи ветото да опстои, дури и најуспешните во чекорењето можат да се соочат со пречки на крајот, изјави Сиљановска Давкова.
Таа нагласи дека иако ретко дава коментари на изјави од ваков тип, чувствува обврска да реагира на, како што рече, премногу бирократското перцепирање на Европската Унија.
Премиерот Христијан Мицкоски изјави дека: „Нема да станеме жртва на билатерализацијата на процесот за членство во Европската унија“, додавајќи дека имаат црвени линии.
Тој рече дека македонските граѓани направиле многу исклучоци.
– Кажавме што можеме и ова е максимумот. Тоа им е кажано на сите фактори во светот, на сите кои одлучуваат или имаат каква било улога во светската политика, изјави Мицкоски.
Текстот е сопственост на Фронтлајн