ВМРО-ДПМНЕ и Владата со месеци гради атмосфера на дестабилизација и бара виновник во опозицијата.
Дестан Јонузи
Имаме поголемо животно искуство во различностите од самата Европска унија и време е повеќе да се зборува за европеизација отколку за дестабилизација, а главни фактори во оваа насока се некои политичките партии, велат за „Фронтлајн“, познавачи на политичките збиднувања во земјава.
Ивон Величковски – лидер на Движењето за нова република, поранешен пратеник и лидер на Либералната партија вели дека „со гласање за интерпелациите, опозицијата ќе докаже дека не поддржува нарушување на меѓуетничките односи. И обратно“.
– ВМРО-ДПМНЕ и Владата со месеци гради атмосфера на дестабилизација и бара виновник во опозицијата. За тоа време Мицкоски се обидува националната политика да ја сведе на етно-партиски договор, а Филипче на малцински партнер во неа. Перформансите на (челниците) на МВР и до крајот на ноември секако се доволна основа за барање нивно разрешување. Истото се однесува на Министерството за етнички заедници. Нивното отсуство во превенцијата на настаните, објаснува дека Владата не е „изненадена” туку вградена во влошувањето на меѓуетничките односи. Девучиќевизацијата на националната политика во Северна Македонија започнува со координирана опозициска политика, изјави Величковски за „Фронтлајн“.
Џелал Хоџиќ – претседател на СДА Македонија смета дека реториката на дел од партиите уште од предизборието, во која етничките Македонци се поттикнуваа да размислуваат дека Албанците имаат премногу власт и дека Македонците се народ од втор ред, како и пораките со слоганите „Македонија повторно твоја”, потоа и системското напаѓање на концептот на правична и соодветна застапеност, што е Уставна норма, која е резултат на Охридскиот рамковен мировен договор, придонесе да се создаде перцепција кај Албанците и немнозинските заедници дека национализмот на ДПМНЕ и ЗНАМ ќе се обиде да чепне во веќе остварените права на голем процент од населението.
– Одговорите на сето ова, кои секако беа за очекување, од албанскиот политички фактор, кој има и моќ и механизам да се спротистави на оваа перцепција, дополнително ја зовријаа атмосферата, затоа што политичкиот одговор во јавноста од ДУИ и ВЛЕН исто така содржеше одредени националистички пораки од кои кај етничките Македонци служеа за подигнување на спиралата на национализмот и потврда на создаваната перцепција дека Албанците сакаат доминација. После изборите ВЛЕН се повлече од ветените позиции и влезе во власта со ДПМНЕ и ЗНАМ, вели за Фронтлајн, Хоџиќ.
По инцидентите на 28 ноември кои се проследени со заострена реторика меѓу политичките партии, верските лидери во Северна Македонија повикаа на соживот.
– Бог ни дал да живееме во една, заедничка држава. Затоа ние, поглаварите на Македонската православна црква ‒ Охридска архиепископија, Исламската верска заедница, Католичката црква, Евангелско-методистичката црква и Еврејската заедница, ги повикуваме сите македонски граѓани да не потклекнат пред некои обиди за нарушување на соживотот, туку сите заедно да продолжиме да ја запазуваме почитта едни кон други, кон државните симболи на нашата Татковина и кон симболите на сите етнички заедници во неа, соопштија верските заедници.
Текстот е сопственост на Фронтлајн