И покрај овие тешки предизвици, постои причина за надеж. Бранителите на човековите права, независните новинари и безброј обични луѓе продолжуваат да се борат за вистината и правдата, одбивајќи да бидат замолчени.
ЦивилМедиа
На Меѓународниот ден на човековите права, CIVIL – Центар за слобода алармира за црната реалност во која човековите права се под жесток напад низ целиот свет. Од разорните ефекти на војната до потиснувањето на слободите од авторитарните режими – принципите на достоинство, правда и еднаквост се газат секојдневно.
Во Украина, руската агресија ги открива ужасните последици на неконтролираната тиранија, додека на Блискиот Исток, насилствата и разурнувањето продолжуваат да сеат хаос и да одземаат невини животи. Воени злосторства, вклучително и намерното таргетирање на цивилите, систематско мачење и користење на гладта како оружје, стануваат алармантно нормализирани. Овие трагедии се дел од поширок, координиран напад на човековите права кој се храни од стравот и поделбите и го задушува отпорот.
Уништувањето на училиштата, болниците и хуманитарните коридори покажува шокантно игнорирање на меѓународното право и светоста на животот. Овие злосторства бараат не само глобална осуда, туку и решителни, обединети дејствија за да се доведат сторителите на злосторства против човештвото пред лицето на правдата и да се спречи понатамошно кршење на човековите права и слободи во светот.
И покрај овие тешки предизвици, постои причина за надеж. Бранителите на човековите права, независните новинари и безброј обични луѓе продолжуваат да се борат за вистината и правдата, одбивајќи да бидат замолчени. ЦИВИЛ апелира до демократските влади, организациите и поединците да ја обноват својата посветеност кон универзалните вредности на слободата, еднаквоста и достоинството на човекот. Мора да ги обновиме напорите да ги подобриме образованието, медиумската писменост и граѓанското вклучување како моќни алатки за спротивставување на пропагандата, омразата и екстремизмот.
На овој Ден на човековите права, ЦИВИЛ ги повикува сите да се приклучат на борбата за одговорност, солидарност и иднина во која човековите права се заштитени и почитувани од сите за сите. Патот пред нас е тежок, но тоа е пат што мора да го изодиме заедно – за доброто на човештвото и идните генерации.
Ве молиме посетете го веб-сајтот на #DefendingDemocracy (англиски) за да дознаете повеќе за меѓународната конференција во Скопје, 11-12 декември. За македонски, кликнете ТУКА.
Текстот е сопственост на ЦивилМедиа