Владата го повлече од собраниска процедура Предлог на закон за средното образование, второ читање. Ова го соопшти претседателката на собраниската Комисија за образование, наука и спорт Иванка Василевска на денешната седница, на која присуствува и министерката за образование и наука Весна Јаневска. Пратениците на Европскиот фронт изразија задоволство од одлуката на Владата и побараа еден час пауза за координација.
-Владата со допис од 20 декември го повлекува Предлог-законот за средно образование, во второ читање, информираше Василевска пред усвојувањето на дневниот ред на комисиското заседание.
Илире Даути и Арбана Пашоли од коалицијата на Европскиот фронт изразија задоволство од повлекувањето на Законот, посочувајќи дека не се согласувале со неколку ставови во овој закон, особено со член 54 со кој се предвидуваше интонирање на државната химна, за што одлучува основачот, на прослава на денот на средното училиште (патронат), на почетокот и на крајот на наставната година и завршувањето на средното образование.
Според Даути, тоа треба да ја рефлектира мултинационалната разноликост и потребна е дебата за ваков закон.
Пашоли, пак, додаде дека по повлекувањето на законот пратениците на Европскиот фронт треба да се координираат и побара еден час пауза. Седницата ќе продолжи во 14 и 20 часот.
На дневен ред на комисиската седница се и Предлог-закон за образование на возрасни, Предлог-закон за стручно обрзование и обука и Предлог -закон за измени и дополнувања на Законот за основното образование, сите во второ читање. За овие закони се поднесени триесетина амандмани.