Денеска, 8-ми април, се одбележува Меѓународниот ден на Ромите. Овој ден е потсетување на долгогодишната борба за подобар и подостоинствен живот на оваа група луѓе, како и прославување на уникатната и богата ромска култура.
Меѓународниот ден на ромите бил прогласен во 1990 година на четвртиот Светски ромски конгрес на Меѓународната ромска унија, кој се одржал во Сероцк, Полска. Овој конгрес бил одржан во спомен на првата поголема меѓународна ромска средба во Честфилд крај Лондон од 7 до 12 април 1971 година. На овој конгрес биле донесени химната и знамето на Ромите.
O styago le romengo, знамето на Ромите, се состои од сина и зелена боја кои ги претставуваат небото и земјата. На средината на знамето се наоѓа тркало, црвена чакра, кое ја претставува миграцијата на Ромите.
Џелем, Џелем е химната на ромската заедница, компонирана од страна на Жарко Јовановиќ. По доживувањето на затворањето на Ромите за време на Ромскиот геноцид, Јовановиќ подоцна го напишал текстот за песната „Џелем џелем“ и ги споил со традисионалната ромска мелодија во 1949 година.
Стихови: Тргнав да патувам
Сретнав среќни Роми
О Роми, од каде доаѓате,
Со среќните шатори крај патот?
О Роми, О млади Роми!
Еднаш и јас имав среќно семејство,
Црната легија ги уби нив
Дојди со мене, Рому од каде и да си
За Ромите сите патишта се отворени
Сега е времето, станете Роми сега,
Ќе се издигнеме високо ако делуваме сега
О Роми, О млади Роми!
Отвори ги Боже, белите порти
Да ги видам моите луѓе.
Вратете се да патуваме на патиштата
И да пешачиме со среќните Роми
О Роми, О млади Роми!
Горе, Ромски народе! Сега е времето
Дојдете со мене, Роми од целиот свет
Темното лице и темните очи,
Ги сакам како црно грозје
О Роми, О млади Роми!
Ромите се една од најраспространетите етнички групи во светот, со население од над 12 милиони кои живеат во различни земји. Ромите во Македонија се најранлива етничка заедница, која се соочува со дискриминација во речиси сите сфери на општественото делување. Но, и во многу други земји тие се маргинализирани и се соочуваат со сиромаштија, невработеност и недостиг на пристап до образование и здравствена заштита, а често се и предмет на расистичко насилство, говор на омраза и дискриминација во домувањето, вработувањето и други области од животот.
На правата на Ромите во земјава и во Европа треба доправа да се работи. Меѓународниот ден на Ромите, нека биде само еден потсетник за нивната значајна улога во европското семејство на народите.