Националното студентско тело на 30 април поднесе официјални барања за итно носење на Законот за студентско организирање.
Нивните барања беа упатени до МОН, министерката Јаневска, претседателот на Собранието, Африм Гаши, претседателката Силјановска – Давкова, претседателката на Комисијата за образование, наука и спорт при Собранието, Иванка Василевска и Драгана Бојковска претседателката на Клубот за младински прашања и политики при Собранието.
Поднесените документи произлегуваат од заедничкиот заклучок на средбата одржана на 25 октомври 2024 година помеѓу Националното студентско тело и министерката за образование и наука, на која се согласија дека е неопходно донесување посебен Закон за студентско организирање. Предлог-текстот на законот беше изготвен од студентски претставници и подоцна финализиран во рамки на работните групи за измени на Законот за високо образование, велат во соопштението од Националното студентско тело.
Тие сметаат дека овој закон треба да биде донесен пред почетокот на академската 2025/2026 година.
Од Националното студентско тело велат дека со овој Закон ќе постигнат: Обединување на студентскиот глас на национално ниво, јакнење на комуникацијата со државните институции, институционализирано решавање на студентските предизвици, поттикнување на инклузивност и еднаквост меѓу студентите, создавање основа за членство во Европската студентска унија (ESU), поддршка за студентските организации низ целата држава.