Германија планира да купи американски противвоздушни ракетни системи „Патриот“ за Украина, изјави денес германскиот канцелар Фридрих Мерц.
Разговарав за тоа со претседателот Трамп минатиот четврток и го замолив да ги испорача овие системи“, рече Мерц на конференцијата за реконструкција на Украина во Рим.
Министрите за одбрана на двете земји разговараат за можен договор, но конечна одлука сè уште не е донесена, рече Мерц.
Тој истакна дека на САД им се потребни дел од достапните системи „Патриот“ за сопствена одбрана и не прецизираше колку системи Берлин има намера да купи. ДПА дознава дека се дискутира за два ракетни системи.
Трамп оваа недела изјави дека одобрил испорака на оружје за Украина бидејќи е незадоволен од одбивањето на рускиот претседател Владимир Путин смислено да учествува во мировните преговори. Подоцна тој рече дека желбата на Украина да добие нови „Патриоти“ ќе биде разгледана.