Постапката за пожарот во Кочани и постапката против сопственикот на агенцијата за обезбедување Рубикон се споени. Одлуката е донесена на денешното прво рочиште за пожарот во Кочани.
Обвинителниот акт за Рубикон беше одобрен во октомври годинава. Сопственикот Александар Нацев се товари за тешки дела против општата сигурност, поради сериозни пропусти во организацијата и спроведувањето на мерките за заштита во објектот.
Нацев се товари за особен придонес во трагедијата бидејќи заедно со други веќе обвинети и непознати лица, не постапил според прописите и техничките правила за заштита, со што предизвикал опасност за животот и телото на луѓето, како и за имотот од големи размери.
На критичниот ден, тројца лиценцирани и еден нелиценциран вработен биле задолжени за обезбедување на објектот, без претходна безбедносна проценка, без проверка на сигурносните услови, излези и можности за евакуација. Објектот бил преполн, а не бил изготвен ниту доставен План за обезбедување за настан со поголем број посетители.
Вработените дозволиле влез на малолетници по полноќ, а не бил извршен ниту преглед на лицата при влез, со што не бил спречен внесот на пиротехнички средства директна причина за пожарот.
Во пожарот во Кочани на 16. март загинаа 63 лица, а над 200 беа повредени. Некои од нив, се уште се лекуваат од траумата и повредите здобиени од пожарот.