За време на Самитот на лидерите „Нашиот пат кон ЕУ“, кој се одржува во Тирана, Албанија посочив дека за Македонија, Планот за раст е многу повеќе од иницијатива. Тоа е приказна за претворање на заложбата во вистинска промена.
Ова беше резултат на посветена работа и на цврсто верување во европските вредности. Нашата реформска агенда, одобрена од Европската комисија, се фокусира на она што навистина е важно добро владеење, чиста енергија, образование, развој на бизнисот и владеење на правото. Ова не се апстрактни цели. Тие се темелите на современата европска држава, секојдневната реалност што сакаме да ја обезбедиме за нашите граѓани, напиша на својот Фејсбук ѕид премиерот Христијан Мицкоски за неговото денешно учество во Тирана на средбата на лидерите од земјите од Западен Балкан со еврокомесарката за проширување Марта Кос.
Оваа година поднесовме две барања за исплата на средства, со кои се поддржуваат приоритетните реформи на Владата, особено во областа на дигиталните услуги, зајакнување на деловната клима и подобрување на енергетската ефикасност. Нашата зелена транзиција, од енергетски ефикасни студентски домови до нови инвестиции во транспорт и железничка инфраструктура, покажува дека растот и одржливоста можат да одат рака под рака.
Овие чекори се доказ дека кога ги интегрираме нашите пазари, кога ги поврзуваме патиштата и кога ги усогласуваме правилата, веќе ја практикуваме Европската унија и нејзините вредности, напиша на Фејсбук премиерот на Република Северна Македонија Христијан Мицкоски.