Тирана: Неколку стотици граѓани и полицијата се судрија пред зградата на албанскиот парламент во Тирана, каде што демонстрантите протестираа против планираната изградба на луксузен туристички комплекс на јадранскиот брег.
Полицијата употреби водени топови и солзавец за да ја растера толпата, откако дел од демонстрантите фрлаа јајца и шишиња кон полициските сили и се обидоа да ги отстранат заштитните бариери околу парламентот.
Протестите, кои траат речиси два месеци, организаторите ги нарекуваат „револуција на фламинго“, алудирајќи на птиците што живеат во заштитеното мочуриште каде што е планирана изградбата на туристичкиот комплекс.
Демонстрантите тврдат дека проектот ќе предизвика сериозна еколошка штета и ги обвинуваат властите за корупција и фаворизирање на инвеститорите. Албанскиот премиер Еди Рама ги отфрла обвинувањата, оценувајќи дека протестите имаат политичка позадина.
На протестот беа распоредени околу 500 полицајци, кои поставија метални бариери и воспоставија безбедносен кордон околу парламентот. Тензиите се зголемија кога дел од демонстрантите почнаа да бараат промена на власта и повикаа на продолжување на протестите.
Ќе ги продолжиме протестите за да извршиме притисок врз нив. Ако нема притисок, тие ќе продолжат да ја продаваат Албанија, изјави еден од учесниците.
Демонстрантите фрлаа јајца и кон возила на владини претставници, меѓу кои и кон автомобилот на министерот за одбрана Ермал Нуфи, при што извикуваа обвинувања против власта.
Во судирите повредени се шест полициски службеници, кои биле пренесени во болница. По блокадата на пристапите до парламентот, полицијата интервенираше со водени топови за да ги расчисти улиците.
Проектот за туристичкиот комплекс е поддржан од американскиот бизнисмен Џаред Кушнер, зет на американскиот претседател Доналд Трамп, што дополнително ја зголеми политичката чувствителност на случајот.