Светскиот ден на театарот е востановен во 1962 година и денеска се одбележува во стотина земји од националните театарски институти.
Секоја година истакната личност од театарот пишува меѓународна порака во име на Интернационалниот театарски институтот, што УНЕСКО го формирал во 1948 година. Таа се преведува на повеќе од 20 јазици и им се чита на гледачите пред почетокот на претставите во театрите низ светот. Оваа година светската порака за Денот на театарот ја напиша нобеловецот Дарио Фо.
Македонскиот центар на ИТИ направи видео со актерката Ирена Ристиќ, во режија на Ана Јакимоска.
Денеска, по повод светскиот ден на театарот ќе се одржи и отворената панел дискусија во Евро Балкан – новото седиште на новиот Македонски Центар на Интернационалниот Театарски Институт. Тема на дискусијата е „ „Какви театарски продукции посакувам/е? Какви видови театри/репертоари ни се потребни?“
-Целта на оваа дискусија е да се увидат актуелните состојби и потребите во/на современите драмски уметности во Македонија. Се надеваме на заинтересираност, конструктивен фидбек и инспиративни дискусии, вели Иванка Апостолова од центарот на ИТИ
Македонскиот театарски институт се придружи на одбележувањето во 1997 година и оттогаш и личност од областа на театарот во Македонија пишува национална порака, која заедно со светската се чита на денот на театарот. Годинава македонската порака ја напиша Мими Таневска, актерка и професор на ФДУ во Скопје.
„Театарот треба да биде отворена врата за сите храбри, авангардни и креативни идеи. Отворена врата за секоја нова генерација на театарски создаватели кои се должни да го надградуваат и да го унапредуваат. Театарот е континуитет и мора постојано да се движи напред, не смее да има празен од“, напиша Мими Таневска, во македонската порака за Светскиот ден на театарот.
„Театарот треба да биде доследен на својата цел: да ги отвора вистинските прашања, да коментира, да просветлува, да вознемирува, да возбудува, да открива, да го одбира и да оди по патот на вистината, да го покренува духот, да воспоставува систем на вистински вредности, да бранува, да раздвижува, да гради високи естетски критериуми, да провоцира, да го брани својот интегритет, да ги крши конвенциите…“, вели Таневска во пораката. Таа ќе биде прочитана вечерва пред почетокот на претставите во сите театри.