Откако цели осум години стоеше недовршена, зградата „Филип“, еден од објектите поврзани со градежната афера „ФИКОМ“ е купена од фирмата „Дан-Мак“ која ја доизгради и сега ги продава становите. Граѓаните кои преку „ФИКОМ“ дадоа пари да си купат станови во оваа зграда, останаа без пари и без станови.
„Нашите станови се продаваат“. Вака дел од оштетените граѓани во аферата „ФИКОМ“ кои речиси цела деценија бараат правда по македонските судови го опишуваат најновиот расплет поврзан со еден од објектите кои беа дел од аферата.
„Според судовите за нас зградата не постои, но за Еуростандард Банка и новата фирма постои“, вели Драгица Петрушевска, една од граѓаните која уплатила речиси 40 илјади евра за да купи стан во истата зграда.
„Револтирани сме на судот бидејќи ни ја зема зградата со образложение дека таа правно не постои. Ние најдовме судски вештак кој докажува дека таму има зграда чии инвеститори сме ние. И сега фирмата „Дан-Мак“ ги продава нашите станови. Ние бараме да не обесштетат со парите, а никој не не контактирал за ништо“, вели Петрушевска за НОВА.
Зградата „Филип“ која се наоѓа кај поранешната фабрика „Треска“, сега е реновирана и изгледа како штотуку изградена нова зграда. На едната страна од зградата со големи букви се испишани зборовите „Дан-Мак Изградба Инжинеринг“, додека на другата стои платно со оглас за продажба на станови и локали.
Според Централниот регистар, фирмата Изградба Инженеринг Дан-Мак ДООЕЛ има данско потекло и нејзин сопственик е Даниел Норнилд од Данска, додека управител е Енида Норнилд.
„Нас судот кога не одби ни кажа дека не постои објектот. Значи не убедуваат дека не постои објектот кој е изграден со наши пари и сега се продаваат становите. Како може во непостоечки објект да се продаваат становите?“, прашува Лена Аврамовска, која исто така во „ФИКОМ“ уплатила 15 илјади евра како една рата за стан во зградата.
Револтираните граѓани кои се оштетени во аферата „ФИКОМ“ најавуваат протест пред зградата за оваа сабота во 11 часот.
Адвокатот на фирмата „Дан-Мак“, Дејан Павловски за НОВА потврди дека оваа градежна компанија ја купила зградата од Еуростандард Банка. Сопственикот на „Фиком“, Никола Николиќ, ја дал идната градба под хипотека на банката.
Според него, на граѓаните никој не може да им го одземе правото на протест, но како што вели, „тие треба да протестираат пред институција или пак пред одредена банка на пример, или пак кај стечајниот управител“.
„Таа зграда е изградена со пари на Еуростандард Банка со кредит како идна недвижнина и со тие пари е изградена таа недвижност. Во стечајната постапка за „ФИКОМ“, банката го извлече тој имот како разлачно право, и имотот се продаваше пред извршител. Во извршната постапка „Дан-Мак“ го купи објектот и го догради по што сега се продаваат становите. Оштетените граѓани треба да се тужат со банката и тие граѓани треба добро да го распрашаат стечајниот управител на „ФИКОМ“ за нивниот случај. Банката докажала дека зградата е нивна“, вели Павловски за НОВА.
Станарите на „Филип“ сметаат дека Еуростандард банка нема право на сопственост на објектот и тие од Судскиот совет на Македонија бараа поништување на договорите за хипотека склучени помеѓу „Еуростандард банка“ и сопствениците на парцелата каде што е изграден објектот.
Од Катастарот за недвижности за НОВА велат дека кај нив воопшто не е запишана зградата и нема доставено барање за запишување на станови. На нашето прашање како се продаваат становите доколку објектот не е заведен во катастарот, оттаму велат дека немаат информации како се продаваат становите.
„Самата зграда не е запишана во катастарот, но земјиштето го има. Досега кај нас нема поднесено барање за запишување или купопродажба“, велат од Катастарот за недвижности.
Прашања за тоа дали на граѓаните кои платиле за станови во оваа зграда, треба да им биде признаено правото на сопственост и дали ќе добијат некакво обсештетување, беа испратени и до Еуростандард Банка, но до објавувањето на текстот не добивме одговор.
Никола Николиќ, директорот на „ФИКОМ“, минатиот март беше пронајден обесен во затворот во Штип, каде отслужуваше затворска казна. Неговото семејство преку медиумите изрази сомневања дека не се работи за самоубиство. Аферата „Фиком“ според неофицијални проценки тежеше над 12 милиони евра и оштети стотици семејства кои останаа без платените станови.
Повеќе детали за историјата на аферата „Фиком“ и оштетените граѓани може да се прочитаат во сторијата на следниот линк.