Вчерашното насилство на границата помеѓу Грција и Поранешната Југословенска Република Македонија близу Идомени и сцените со користење солзавец во големи размери предизвикаа голема загриженост кај УНХЦР. Тоа треба да биде така кај сите што се загрижени за одговорот на Европа на состојбата со бегалците и мигрантите, изјави денеска портпаролот на УНХЦР во Женева Адриан Едвардс.
– Многупати во изминативе месеци гледавме како се случуваат тензии на различни европски граници, помеѓу безбедносните сили од една страна и луѓето што бегаат од војна и на кои им треба помош од друга страна. Се повредуваат луѓе и се уништува имот. Се нанесува штета на впечатокот за бегалците исто колку и на имиџот на Европа и сите губат, сметаат во УНХЦР.
Во текот на изминатите денови, се наведува во соопштението, вниманието на медиумите и јавноста беше насочено кон начинот на спроведување на договорот помеѓу ЕУ и Турција на егејските острови и во Турција.
Притоа укажуваат дека не треба да се заборават многуте други бегалци и мигранти коишто продолжуваат да бидат засегнати од ситуацијата, посебно речиси 46.000 лица на грчкото копно коишто пристигнаа пред да стапи договорот во сила. Во Идомени, околу 11.000 лица спијат веќе повеќе недели на отворено во невидено тешки услови коишто ги поттикнуваат на безнадежност и очај.
УНХЦР изразуваат подготвеност да го поддржат доброволниот трансфер на лица кон центрите коишто ќе ги подигне грчката Влада, заедно со потребните услуги за време на регистрацијата и процесирањето. Во меѓувреме, во Идомени, УНХЦР заедно со грчката влада, грчките НВО и други партнери обезбедува храна, медицинска помош, помош за лицата со специфични потреби и превенција и одговор на сексуално и родово насилство.
– Пошироко решение – да се релоцираат оние коишто се квалификуваат за меѓународна заштита во други држави на ЕУ – е договорено пред многу месеци. Потребно е делување. Насилството е погрешно какви и да се условите. УНХЦР се надева дека Европа ќе ги преземе потребните чекори сега и остануваме подготвени дополнително да им помогнеме на владите да ги исполнат своите обврски кон бегалците, велат од УНХЦР.