Објавувањето на одлуката на претседателот Ѓорѓе Иванов за аболиција на вклучените во кривичните и истражните постапки кои произлегуваат од скандалот со прислушувањето, но и други случаи, на виделина изнесоа и детаљи околу лица за кои досега не беше познато дали и какви постапки се водат во јавноста, но фрлија и сомнеж околу надлежностите на претседателот на помилува лица од случаи кои биле само во предистражна постапка.
Дел од овие лица беа „главни ликови“ во многу од истражувањата на кои работеа новинарите на НОВАТВ. Нивните имиња беа поврзувани со сомнежи за трговија со влијание, корупција и финансиски малверзации. Покрај Гордана Јанкулоска, Сашо Мијалков, Никола Груевски, Дејан Митровски-Урко, Зоран Заев, Бранко Црвенковски и плејада други, во одлуката објавена денеска се појавија и имињата на Коста Крпач, Владислав Стајковиќ и Христијан Панев.
Кои се Стајковиќ и Крпач
Аферата со прислушувањето отвори низа горчливи прашања за тоа дали опремата за следење на комуникациите се користела законски. Но, „бомбите“ на Зоран Заев открија сомнежи и за други незаконски дејствија во оваа институција. Јанева веќе го побара случајот „Израелска опрема“ во којшто осомничен за поткуп е Сашо Мијалков, а вмешан е и Владислав Стајковиќ.
НОВАТВ минатата година го истражуваше случајот со изреалската опрема, а дел од лицата и компаниите кои се споменуваа во прислушуваните телефонски разговори беа фокус и да други истражувачки стории на НОВАТВ, како и на проектот за истаржување на медиумската сопственост „Медиапедиа“.
Владислав Стајковиќ или во бомбите нарекуван „Влатко“ е личноста со која судијката од Управниот суд, Светлана Костовска договара што да стои како основ за да легнат парите од договорените провизии утврдени во разговорите со директорот на УБК Сашо Мијалков, како што тврди лидерот на СДСМ Зоран Заев. Во транскриптите коишто опозицијата ги доставува до медиумите, „Влатко“ е напишан како Влатко Стајковиќ, а во еден од телефонските снимки помеѓу Костовска и израелскиот посредник, таа ја споменува фирмата НВСП како фирма на којашто сметка би требало да легнат средствата, а со Влатко се договара со каква назнака би легнале истите.
НВСП, според досегашните објавени истражувања на базата за медиумска сопственост „Медиапедија“ е компанија којашто се занимава со различни дејности – од консултантски и адвокатски услуги, обезбедување на резиденции, дистрибуција на мобилни телефони, дозвола за промет со оружје и со муниција, медиуми и друго. Сопственик на НВСП е Владислав Стајковиќ.
Според евиденцијата на Централниот регистер на Македонија, компанијата НВСП е сопственик на Радиото Слободна Македонија во кое што свои емисии имаат Миленко Неделковски, новинарките на Сител телевизија Славица Арсова и Наташа Мерсовска, професорката на правниот факултет Татјана Каракамишева, екс-вицепремиерот за евроинтеграции Ивица Боцевски и други новинари и експерти кои што во јавноста важат за блиски до владејачката ВМРО ДПМНЕ. Радио Слободна Македонија има седиште на иста адреса со неделникот и портал „Република“, чијшто газда е фирмата „Ирезине Лимитед“ од државата Белизе.
Фирмата НВСП ја поседува и телевизијата К3 (поранешен „Златен канал“) од Куманово. НВСП е формирана во 2006 година. Стајковиќ, покрај тоа што е основач на НВСП, тој е и директор на фирмата „Мобико“, каде што сопственик е извршниот директор на Т-Мобиле, Жарко Луковски.
Луковски, пак, приватно е близок пријател, а од неодамна и кумашин на директорот на Управата за безбедност и контраразузнавање (УБК), Сашо Мијалков. Шефот на тајната полиција беше кум на свадбата на Луковски со неговата избраничка годинава.
Стајковиќ, исто така, е и член на Надзорниот управен одбор на Државна видео-лотарија, новата заедничка фирма на македонската Државна лотарија и на австриската „Касинос Аустриа“, преку која ќе се организира видeо-лотаријата што неодамна ја најави Владата. НОВА пишуваше за овој случај, каде што откривме дека доминантен сопственик на „Касинос Аустриа“ е, всушност, офшор-компанија од Лугано, Швајцарија.
Владислав Стајковиќ, преку НВСП, бил и првиот газда на фирмата за обезбедување имот и лица, популарната СГС, но и прв газда и на скопската компанија „Финзи“, која денес под свое го има Нетпрес, еден од најгласните провладини медиуми.
Кога сме кај овие компании, тука влегува името на Коста Крпач.
Тој е академски сликар и се води како директор на компанијата „Финзи ДООЕЛ“ која сега е сопственик на веб-порталот „Нетпрес“.
Aко се погледне историјатот на фирмата „Финзи ДООЕЛ“, се гледа дека прв управител на фирмата во 2009 година бил Владислав Стајковиќ. Не се знае со што се занимава оваа компанија бидејќи до веб страницата www.finzi-mk.com пристап има само сопственикот. Како сопственик на „Финзи“ се води компанија од офшор дестинацијата Кипар.
Нејасно е како Иванов одлучил да помилува лица за кои се води само предистражна постапка, но и како претседателот во такви детаљи знаел какви истраги има во СЈО.