Министерката Гордана Јанкуловска изјави дека во текот на денешниот ден крим-техничките вештачења за несреќата во која загина новинарот Никола Младенов ќе му бидат предадени на истражниот судија.
Министерката не сакаше да сподели детали од вештачењата со новинарите. Јанкуловска изјави дека тоа ќе му го препушти на надлежниот истражен судија и тој ќе требал да процени дали ќе сподели нешто со јавноста и кога би го сторил тоа.
“Министерството за внатрешни работни нема да изнесува податоци бидејќи истрагата ја води надлежен истражен судија. Ние завршивме со крим техничките вештачења и во текот на денот ќе му бидат презентирани на истражниот судија, а потоа зависно од неговата останува на истражниот судија да процени дали, кога и во која форма да ја информира јавноста”, одговори министерката на новинарско прашање.
Од МВР информираат дека крим-техничкото вештачење е комплетно завршено, а недостасува само вештачење за техничката исправност на возилото. Тоа ќе го препуштеле на некоја независна институција како Бирото за судски вештачења.
Немаше одговор ниту дали е пронајден мобилниот телефон на Младенов, откако во јавноста се појавија информации дека телефонот не бил најден, иако полицијата преку него успеа да го лоцира местото на несреќата.