Во организација на Моден Викенд Скопје и Амбасадата на Соединетите Американски Држави, синоќа во нејзините простории во Скопје се одржа модна ревија на која беа претставени финалистите на конкурсот ПОП!Мода.
Присутните можеа да ги видат креациите на Алмир Мили, Ана Камчева, Арта Шаќири и Мешите Лочи, Елена Додевска и Хана Миленковска, Елена Ивановски, Еми Норис, Гордана Вренцовска, Ивана Цветковска, Ксенија Котева, Марио Милосов, Марио Додовски, Орнела Јордановска и Виктор Цветановски.
– По успехот на проектот „Џез и мода“, што се одржа во Амбасадата на Соединетите Американски Држави – Скопје во рамките на Моден викенд Скопје пролет/лето 2012, оваа сезона Моден викенд Скопје со задоволство ја продолжи соработката со Амбасадата на САД, со проектот на тема „ПОП! Мода“, соопштуваат од Моден викенд.
Во февруари беше објавен отворен повик на кој можеа да аплицираат и млади и етаблирани модни дизајнери, дизајнери на накит и модни додатоци, како и студенти по моден дизајн со идеи инспирирани од богатата американска ПОП култура.
Жирито составено од претставници на Амбасадата на САД, Моден викенд Скопје и Текстилното трговско здружение – Текстилен кластер на Македонија, избра 13 тимови на дизајнери од речиси 40 пристигнати апликации.
Покрај ревијалниот, проектот имаше и едукативен дел и обука – 13-те тимови учествуваа на работилници на тема „Бренд менаџмент“, што беа водени од професорот Бјорн Бенгтсон од Модниот институт за технологија во Њујорк