Полицијата го пронашла во Ресен седумнаесет годишниот Марјан, кој исчезна од Трговскиот центар каде што собираше пари за операција на очите. Неговите родители се револтирани бидејќи полицајците не го застанале кога го забележале, туку го пуштиле да се качи во автобус за Битола. Неговата мајка Вики Стојановиќ, тврди дека Марјан има проблем со ориентација во простор, а полицијата не превземала ништо за да го врати дома малолетникот. Со себе немал голема сума на пари.
„Само што дојдов од полициска станица, ми кажаа дека пред малку дека бил забележан во Ресен од каде се качил во автобус за Битола. Сега се подготвувам да одам во Битола, но каде ќе го најдам не знам. Можеби во меѓувреме се качил во автобус за некој друг град. Во последно време Марјан има проблем со ориентација во простор и му се случило неколку пати кога ќе излезе да не знае да се врати. Затоа покрај операцијата на очите, сакаме да испитаме што се случува и со неговата глава“, изјави за НОВА Вики Стојановиќ , мајка на седумнаесет годишниот Марјан.
Таа тврди дека во понеделникот во 11 часот последен пат се слушнала со нејзиниот син. После тоа, тој бил недостапен на неговиот мобилен, па така татко му отишол во Трговскиот центар да го побара, но таму го немало. Откога не се вратил и утредента случајот го пријавиле во полиција. Четири дена по исчезнувањето полицијата успеала да го лоцира, но го пуштиле да продолжи понатаму сам.
Марјан е ученик во прва година во средното училиште “8 Септември“, отсек за комјутери. Тој стана актуелен во јавноста бидејќи собираше пари за операција, седнат со транспарент во Трговскиот центар во Скопје. Граѓаните масовно се вклучија во акцијата, така што Марјан успеал да собере 1000 евра преку донации, а остатокот од 2 500 евра ги обезбедила неговата мајка која земала кредит од банка. Неговата мајка тврди дека Марјан наскоро има закажано операција во болницата „Свети вид“ во Србија, откако тука бил одбиен во една приватна болница која не му гарантирала успех. Марјан има оштетување на видот од 80 проценти на двете очи.