Во театарот „Војдан Чернодрински“, при Центарот за култура „Марко Цепенков“ во Прилеп, утре вечер ќе биде организиран театарски мини маратон и ќе бидат изведени две комедии кои се во режија на Коле Ангеловски.
Првата претстава „Од кол на кол 1“ ќе започне во 19.30 часот. По нејзино завршување ќе има пауза, а потоа ќе биде изведена „Од кол на кол 2“.
Билетот за посета и на двете претстави изнесува 120 денари, а за време на паузата посетителите ќе можат да се послужат со кафе од театарското бифе.
Од театарот велат дека за комедиите има голем интерес и затоа се одлучиле двете претстави да се играат во една вечер. Оттаму додаваат дека актерите се возбудени што ќе ги играат претставите една по друга.
– Ќеф ни е што ќе ги играме двете претстави – вели актерката Виолета Чакарова.
Во овој театар, инаку, во подготовки е новата куклена претстава „Халифот Штрк“, во режија на Дарко Ковачовски.