Јас сум студент уште еден месец, а потоа најверојатно без работа како и сите други. Вака на екипата на НОВА се претстави младиот Гуѕим Нухиу кој е пред крајот на студиите по меѓународни комуникации. Тој, заедно со демонстрантите на Шарената револуција излегува на улиците константно секое попладне.
-Се жалам од овој режим и немам друга алтернатива освен секој ден во шест. Протестирам за правото да функционира еднакво за сите, да излезат сите криминалци пред законот и да одговараат за нивните дела. Протестирам затоа што не сакам да ја оставам Македонија, сакам тука да живеам, а овој режим не ми го дозволува тоа, вели Гуѕим за НОВА.
Најчесто е во придружба на пријатели, но некогаш може да се забележи на протестите и сам. Некои го поддржуваат, некои обесхрабруваат, но тој вели дека доволно му е што самиот знае зошто го прави тоа.
-Шарената револуција ги прифаќа сите луѓе. Јас тука слободно се чувствувам да зборувам на кој било јазик. Единствениот период од денот од шест до девет, каде сите можеме да го искажеме нашиот револт. Ако досега не сте имале можност да го искажете револтот – тука е местото. Сите се добредојдени, ние се бориме и за правата на граѓаните кои не се охрабриле да излезат на улица, вели тој.