Лидерот на СДСМ, Зоран Заев, на денешната прес-конференција, а во однос на политичката криза, порача дека не може да има селективно поништување на аболицијата.
– Не може аболицијата да се спроведува според изјавите на оние кои се одрекле од неа или според волјата на претседателот Ѓорге Иванов. Аболицијата мора да биде целосно поништена. Законот треба да важи еднакво за сите. Секој што го прекршил законот мора да одговара. Нема спас нити за аболираниот Груевски, нути за неговото друштво, порача тој.
На новинарско прашање дали Заев би сакал да се повлече и аболицијата за него, дадена од екс претседателот Бранко Црвенковски за случајот „Глобал“, тој одговори дека повлекување и на таа одлука бара уште од 2008.
Заев потенцираше дека за да го смират гневот на своите членови, партиите во власта, одлуката за Митко Чавков и Диме Спасов да се вратат на министерските функции, е донесена без согласност на опозицијата.
Според него криминалци се и ВМРО-ДПМНЕ и ДУИ.
– Опозицијата не може да ги контролира и ВМРО-ДПНМЕ и ДУИ. Нашиот политички противник е ДПМНЕ но заслужни за криминалното владеење се подеднакво и ДУИ и ние ниту сме ги штеделе ниту имаме намера да ги штедиме, порача Заев.
Според него секој носи одговорност пред граѓаните и пред членовите на партијата а двете партии се подлабоко влегувале во каша.
– Го тераат Уставен да носи партиски одлуки. Буквално си играат играчки со се што е создавано 25 години. Се додека граѓаните се решени, се додека опозицијата е ипсравена, ние нема да дозволиме избори без фер и регуларни услови. Не очекуваме реформи секаде. Со Груевски тоа не е можно. Како да се надеваме отцепување на партијата и државата со Груевски? Треба прочистен Избирачки список и минимум реформи во медиумите за фер шанса на опозицијата и другите партии. Една од најважните цели е брзи избори. За да замине оваа криминална власт, потенцираше лидерот на СДСМ.
Заев не ги прецизираше идните чекори на опозицијата.