Афганистанските тајни служби потврдуваат дека талибанскиот лидер Мулах Актар Мансур вчера е убиен откако САД го таргетираа во напад со беспилотно летало, јавува ББС. Дронот целел на неговото возило долж границата со југоисточен Пакистан. Американскиот државен секретар Џон Кери рече дека Мансур претставувал „постојана опасност за американскиот персонал кој работи надвор во тие подрачја“.
Кој е Мансур
Мансур го презеде водството над Талибанците во јули 2015 година, заменувајќи го духовниот водач Мулах Мохамед Омар.
Мансур е роден во шеесеттите години на минатиот век и долго време, дури и пред официјалното преземање на лидерството, се сметаше за активен водач на Талибан и многу близок до основачот Мулах Омар. За време на талибанската ера во Афганистан тој беше министер за цивилно воздухопловство. Според Обединетите нации имал и активна улога во светската трговија со дрога.
Веродостојноста на информациите за неговата смрт се уште е под знак прашалник во јавноста. САД и афганистанската влада ја потврдуваат неговата смрт, додека постар талибански комадир за „Ројтерс“ изјавил дека тој не е убиен.
Што значи неговата смрт
Смртта на Мансур се очекува да биде голем удар за Талибан. Тој успеа за кратко време да го зајакне своето владеење носејќи други талибански припадници под свое раководство, како синот и братот на неговиот претходник Омар, како и со многубројните високопрофилни напади врз афганистанските безбедносни сили. Под неговот водство, минатата година Талибан успеа да зароби важен град за прв пат во 15 години. Мансур дури успеа и да ја замолчи ривалската талибанска група под водство на Мулах Мухамед Расол која што го предизвикуваше неговиот авторитет како водач и креирање таканаречена Исламска држава во талибанските области. Вакуумот предизвикан од неговата смрт ќе креира битка околу водството, а со тоа, според Пентагон, ќе се создаде неизбежно ослабнување на талибанските позиции.