Засилениот кордон полиција пред Собранието, кој со метални барикади беше излезен на булеварот тотално поделувајќи ја улицата за демонстрантите да не ја бојат фасадата, сепак не ја спречи Шарената револуција да го остави својот печат на зградата во која се носат закони кои се предмет на револт на демонстрациите.
Имено и денешниот протест како и вообичаено, започна пред седиштето на Специјалното јавно обвинителство, на кој учествуваа граѓани од најразлична возраст. Денешниот марш се одвиваше од СЈО, по улицата кај Рамстор до Законодавниот дом, под поворката „Селективна правда не е правда“.
Пред ЕУ Инфо центарот, на англиски јазик, т.н “генерали“ на Шарената револуција, ја обоија улицата испишувајќи „Selective justice is injustice“ како порака пред меѓународната заедница, дека граѓанската маса која секојдневно протестира во 18 часот, не се согласува со одлуките кои ги носи претседателот Ѓорѓе Иванов.
Пред граѓаните кои протестираа денеска говореа актерот Драган Спасов – Дац, Марјан Ристески од Левица, Дарко Каевски од СДММ и пензионираниот генерал, Илија Николовски.
Сите во своите говори му порачаа на екс-премиерот Никола Груевски, дека местото не му е повеќе во политиката и дека народот кој е излезен на улица, не се плаши од етикетите кои му се придаваат, како ни од снимањата на министерот за внатрешни работи, Митко Чавков. Дел од нивните говори можете да ги погледнете во видеото кое хронолошки го опишува текот на денешните протести.
За крај на денешниот марш, активиран беше импровизираниот чатал за фрлање боја, со кои “Шарените“ сепак успееја да додат боја на и онака обоената фасада на Собранието на Република Македонија.
Протестите продолжуваат утре во 18 часот пред СЈО.