Со државни и шарени знамиња, членовите на Шарената револуција денеска напладне блокираа три раскрсници во Скопје. Сообраќајот беше прекинат на раскрсницата кај Соборен Храм, кај Мавровска и Црвениот крст во Центар. „Шарените“ најавуваат дека протестите нема да запрат, туку од ден на ден ќе се одржуваат во различен вид.
-Овој систем веќе не смее да глуми нормалност. Мислам дека ги прегазија сите можни чекори и рамки. Во последните денови сме под голема закана и притисок да престанеме со Шарената револуција. Шарената револуција не само што нема да престане, туку ќе продолжи во секаков вид. Нашите барања се познати и ќе чекаме се додека не се исполнат. Се извинуваме на граѓаните на Скопје што денеска ги ставивме во мал хаос, но во интерес на сите нас ние излеговме и го блокиравме Скопје, изјави Алексадар Младеновски од Шарената револуција.
Улиците беа блокирани половина час, а протестите беа мирни. Скандирањето „Нема правда, нема мир“во близина на Соборниот храм се засили, откако повозрасна жена им дофрли на демонстрантите.
-Ова е еден степен на заострување на нашите начини на протест бидејќи по веќе осум недели протестирање, нашите барања се уште не се исполнети. Единствено, делумно е исполнето барањето за одложување на изборите кои беа закажани за 5.јуни и делумно повлекување на аболициите. Ние сакаме сите 56 аболиции да бидат повлечени и повторно да се врати правниот поредок во оваа држава. Ова ќе биде само денеска, и ние им се извинуваме на сите граѓани на кои им го отежнавме овој ден, но ова не го правиме само за нас, туку за сите граѓани на Република Македонија за да се врати демократијата во нашата држава, посочи Демијан Хаџи-Ангелковски, кој учествуваше во блокадата на раскрсницата близу Мавровка.
Граѓаните обединети под Шарената револуција веќе осум недели преку протести бараат повлекување на целосната одлука за аболиција и оставка на Иванов, формирање на специјално одделение на Кривичниот суд за предметите на Специјалното јавно обвинителство, оставка на Владата предводена од ВМРО-ДПМНЕ и ДУИ, како и итно ослободување на притворените демонстранти. Дел од барањата се и вклучување на граѓанското општество во решавање на кризата и формирање на преодна влада.
Се до исполнување на овие барања, тие најавуваат дека нема повлекување од улица.