Претседателот Иванов со одлуката за колективна аболиција на 56 лица опфатил и луѓе кои немаат никакво својство во Специјалното обвинителство, соопшти на денешната прес-конференција обвинителката и портпаролка на СЈО Ленче Ристовска.
СЈО очекува сите аболиции да бидат повлечени, а се уште се чека одговор и за тоа од каде Иванов имал информации дека токму тие лица се осомничени за нешто, за да ги аболицира.
-На претседателот му тече рокот во делот на аболициите кои се веќе поништени. Правдата не смее да има селективен пристап. Ние се уште го очекуваме одговорот од претседателот во смисла на тоа од каде Иванов има информации за осомничени лица во наши тајни предистражни постапки… Веруваме дека претседателот ќе ги отповика и другите одлуки за аболиција. За поништените аболиции постапки продолжуваат во другите делови ќе видиме како ќе се одвива по завршување на рокот, рече Ристовска.
Од друга страна, од кабинетот на Претседателот нема одговор ниту на новинарските прашања за тоа од каде се информациите и по кој основ Иванов ги аболицирал токму тие 56 лица. Минатата недела шефот на државата одлучи аболицијата делумно да ја повлече и тоа за вкупно 22 лица. Како што рече Иванов, цврсто е убеден дека аболицијата која ја донел на 12. април и понатаму смета дека е клучна за решавање на кризата и тоа го направил во интерес на државата и на граѓаните.
-Не сакам веќе никој да има сомнеж. Ниту еден политичар не е над законот, ниту еден политичар не е недопирлив, напротив, секој ќе одговара за своите постапки, изјави Иванов повикувајќи ги сите други кои не се помилувани согласно измените во Законот да поднесат лични барања за поништување на одлуката за нивно помилување.
СЈО денеска соопшти и дека дел од аболираните кои се осомничени во случаите побарале запирање на постапките, но оттаму велат дека истрагите ќе продолжат.
И понатаму аболирани од Иванов остануваат 5 лица осомничени за случајот „Титаник“, тројца за „Тврдина“, шест луѓе осомничени во „Тортура“, и по двајца за предметите „ТНТ“ и „Пуч“. Овие лица СЈО не може да бара кривично да се гонат.
Специјалното јавно обвинителство во моментов води 7 истражни постапки за 60 лица. Дел од нив се фокусирани на финансиски истраги за кои треба определен временски период за да може да се извлечат заклучоци. Целта како што рече Ристовска е да се покаже дека криминалот не се исплати и оние кои го прекршиле законот нема да одговараат само кривично, туку ќе има и материјална казна, односно ќе им биде одземена материјалната корист.
Ристовска потенцира дека СЈО работи неселективно според Уставот и законите, така што сите осомничени се еднакви пред законот.