Со претставата „Надеж. Вечер со Бетовен“ на Државната опера и балет од Анталија, Турција, а во режија и кореографија на Рисима Рисимкин утревечер во Македонската опера и балет ќе биде отворено деветтото издание на „Танц фест“. Вечерта на Владимир Викторович Васиљев, водечки танчер во „Бољшој театарот“ ќе му биде доделена наградата за врвни достигнувања во областа на танцот „Менада“, за која едногласно одлучи Советот на фестивалот.
На денешната прес-конференција присуствуваше и наградениот Васиљев, кој 30 години бил водечки танчер во „Бољшој театарот“. Има огромен придонес во развојот на класичниот балет, преку повеќе балетски претстави и улоги. Во 1971 година почнал да работи како кореограф, театарски и филмски режисер. Повеќе од 10 години ги води постдипломските студии на Државниот институт за изведувачки уметности и го води Факултетот за кореографија при Институтот. Од 1995 до 2000 година ја извршувал функцијата уметнички и генерален директор на „Бољшој театарот“. Васиљев сега е народен уметник на СССР и Русија, професор при Руската академија за изведувачки уметности, член на Руската академија на уметностите и Интернационалната академија на уметностите… Сега слика и пишува поезија.
– Немав сознанија за балетот во Република Македонија и за мене на некој начин ова е откритие. Ова е прекрасен почеток и сметам дека и во иднина повторно ќе се враќам тука и оти ќе имаме соработка, изјави Васиљев.
Присуството на Васиљев во Македонија, смета уметничкиот директор на „Танц-фест“ Рисима Рисимкин, отвора можност за соработки и сигурна сум дека ние, како Интер арт Културен центар нема да оставиме на случајност и нема да ја пропуштиме оваа голема прилика.
– Сигурно ќе направиме нешто за да се продлабочат врските, на обострано задоволство на уметниците во Македонија и Русија, рече Рисимкин.
Нилај Генч Чеби, генерален директор на Државната опера и балет од Анталија, Турција информира дека постојат од 1999 година. Ансамблите на операта, балетот и оркестарот работат засебно, но и заедно подготвуваат претстави. Задоволни се што во Македонија и што ќе настапат на фестивалот.
Рисимкин информира дека „Надеж“ е работена по музика на Бетовен, вториот став од Седмата симфонија и цела Деветта симфонија. Сценографијата е на Тајфун Чеби, а костимите се на Благој Мицевски.
Таа објави дека Скопје Танцовиот театар и Battery Dance Company од САД потпишале Меморандум за соработка. Со тоа, како што рече, ниви професори ќе доаѓаат во Македонија, а наши студенти ќе одат да работат кај нив. Battery Dance Company од САД ќе настапат во рамки на фестивалот, в сабота во Младинскиот културен центар (МКЦ) со „Autobiographica“.
Според програмата на фестивалот, предвиден е настап и на Балетот од Косово. Во рамки на фестивалот низ целата година се предвидуваат повеќе работилници и претстави.