Партијата на рускиот претседател Владимир Путин Единствена Русија потпишала Декларација со политички партии од Србија, Црна Гора, Босна и Херцеговина, Бугарија и Македонија во која потписниците се залагаат за создавање воено неутрална територија на Балканот, објави Б92.
Во Декларацијата се наведува дека во рамки на „намалување на меѓународните тенции“ посебно значење за Југоисточна Европа претставува развојот на иницијативата на „низа балкански политичари за формирање територија на суверени неутрални држави во која би биле Србија, Црна Гора, Македонија, БиХ, се наведува на сајтот на партијата.
-Целта на проектот е да стане стратешка доктрина и во иднина да биде инкорпорирана во општоевропските разгледувања на новата континентална архитектура на безбедноста, се наведува во соопштението.
Потписниците на Декларацијата, разгледувајќи ги актуелните балкански и европските безбендосни проблеми воопшто, ја истакнале неопходноста од барање заеднички „вонблоковски решенија“, развојот на соработката на балканските држави со земјите од Евроазискиот економски сојуз, какон и ширење на мултилатералната соработка во трговско- економската, финансиската и енергетската сфера, пренесува Б92.
Од руска страна, Декларацијата ја потпишал Сергеј Железњак, висок функционер на Партијата, додека во соопштението не се наведува кои се потписниците од балканскиот регион.
Српската агенција Бета пренесува дека Декларацијата е потпишана на 15.Конгрес на Единствена Русија, на која присуствувале претставници на српските партии и од Република Српска, Црна Гора и Македонија.