Американскиот помошник државен секретар за европски и евроазиски прашања, Викторија Нуланд на денешната прес-конференција пред медиумите изрази надеж дека во блиска иднина политичката криза ќе се помрдне од ќорсокак.
– Имавме многу продуктивен ден на средбите во овој многу важен момент за вашата земја. САД се горди што заедно со ЕУ со сите политички сили се обидува да ја надмине политичката криза од минатата година, што резултираше со Договорот од Пржино. Имаше некаков напредок при имплементација на тој Договор но сега е време да се заврши работата и да се отвори пат за слободни демократски избори, изјави Нуланд.
Таа вели дека од Скопје заминува охрабрена по средбите кои ги имаше со лидерите на четирите политички партии.
– Во наредните денови се надеваме дека преговарачките тимови ќе можат да ги разгледаат идеите што се маса и да се движат кон избори. За ова секако ќе биде потребна политичка волја од сите страни и на средбите почувствував дека таа волја ја има, потенцираше таа.
Според неа, исто многу важен процес е зацврстување на судството и владеењето на правото овде во Македонија, а работата на Јанева и нејзиниот тим е од витално значење за во оваа земја да има вистинско владеење на правото, одговорност и чист правен ситем, клучни за Македонија да ги постигне своите евроатлантски цели и да биде членка на ЕУ и НАТО.
Одговарајќи на новинарско прашање за тоа, дали се разговарало за специјален суд, Нуланд вели дека на маса се неколку конструктивни идеи, а она што е најважно системот да биде чист и ефективен.
– Ова е процес кој сите ние сакавме да биде многу побрз. Како што кажав и пред да дојдам, интензивно се работеше со поддршка на САД и ЕУ, за Македонија да се движи кон избори, дополни американската дипломатка.