Новиот Правилник за води се уште не е стапен на сила, а министерот Тодоров веќе ги прогласи резултатите на Институтот за јавно здравје за неважечки. Овој Правилник со кој се негираат резултатите од важечкиот , денеска излезе во Службен весник, а ќе стапи на сила за седум дена.
По забрана за капење во водите на Дојранското езеро, се покрена цела лавина од општината, а министерот изјави дека резултатите се ставени во контекст на правила кои с е одамна напуштени во Европската унија. На барање и во организација на Општина Дојран таму денеска се наоѓаат експерти од Институтот за јавно здравје и од Центарот за јавно здравје во Велес, како и од Државниот санитарен и здравствен инспекторат.
„Денеска излегува новиот Правилник кој не кореспондира со досегашниот кој датира од 1999 година. За споредба, новиот Правилник кој е од 2007 ма во ЕУ, дозволено е многу повеќе ентерококни бактерии и ешерихија коли од дозволеното со важечкиот правилник. Огромна е разликата. Тоа практички значи дека ако ние сме утврдиле 3 класа на вода со досегашниот Правилник, според новиот излегува дека квалитетот на водата е одличен“, изјави за НОВА Михаил Кочубовски, раководител на сектор за здравствена екологија во Институтот за јавно здравје.
Во Дојран денеска биле земни примероци од водата од езерото, која веројатно ќе се работи според новиот Правилник. Кочубовски тврди дека е надминат проблемот со колекторот за прочитување, кој досега не ја прочистувал водата доволно. Но, тврди дека фекалии не се слеваат во езерото.
„Не забележавме дека некаде се слеваат фекалии во водата“, рече Кочубовски.
Директорот на Институтот за јавно здравје Шабан Мемети тврди дека институцијата стои зад резултатите од направените анализи. Не сакаше да го коментира новиот Правилник на кој се повика министерот Тодоров.
„Ние стоиме целосно зад добиените резултати. Ако имало нов Правилник, зошто не се употребува“ рече кратко Мемети за НОВА.
Инспекторите постапиле по важечката процедура, односно по правилникот кој е на сила, тврди директорот на Државниот санитарен и здравствен инспекторат. Тука нема дилема.
„Ние работиме според важечкиот Правилник кој е на сила. Резултатите од анализите на водата се според сегашната регулатива. Со стапување на сила на новиот Правилник , кој откако ќе излезе во Службен весник и стапува на сила за седум дена, тогаш ќе почнеме да го применуваме“, изјави Џевдет Шаќири директор на ДСЗИ.
Од Министерството за здравство не одговорија зошто министерот Тодоров зборува за правилник кој се уште не е стапен на сила. Со тоа јавно ги негираше резултатите на Институтот за јавно здравство кој работи по ИСО стандарди.
Експертите велат дека на ваков начин јавноста е комплетно во забуна, а и чудно што откога се обелодени загадувањето на Дојранско езеро се забрза процедурата за новиот Правилник, кој бил подготвуван изминатиот период .