Кривичниот совет при Основниот суд Скопје 1 – Скопје го прифати предлогот на Основно јавно обвинителство за организиран криминал и корупција и го продолжи притворот за новинарот Зоран Божиновски за 30 дена.
Основното јавно обвинителство за гонење на организиран криминал и корупција вчера поднесе и обвинителен акт Божиновски поради постоење на основано сомнение за кривичните дела злосторничко здружување , шпионажа и уцена.
Од Обвинителството соопштија дека обвинението е поднесено по сеопфатна анализа на прибраните докази. Оттаму бара и продолжување на притворот, што Кривичниот совет на судот денеска го одобри.
За овие кривични дела осомничениот беше гонет во текот на 2013 година, но поради неговата недостапност на органите на прогонот истрагата беше прекината и продолжи по екстрадиција на обвинетиот од Република Србија во Република Македонија на 21.04.2016 година, велат од Обвинителството.
Божиновски беше уапсен по налог на српското Министерство за правда по меѓународната потерница која беше распишана против него во ноември 2013 година, како осомничен во случајот „Шпион“.
Тој во неколку наврати тврдеше дека ова е монтиран случај бидејќи меѓу другото, на власта не и одговарале неговите новинарски написи.