Државната изборна комисија утре на својата веб-страница ќе ги објави имињата на 39. 502 спорни гласачи со рок од 25 дена за тие да се пријават на списокот.
Граѓаните ќе може да се пријават лично, во подрачните единици на Државната изборна комисија, како и во канцелариите на Управата за водење на матични книги, каде гласачите ќе мора да приложат важечка лична карта или пасош.
Втора опција е пријавување на веб страницата на ДИК каде поставена е и апликација за електронско пријавување. Тие ќе треба да го внесат матичниот број и да испратат скенирана копија од лична карта или пасош.
Пријавувањето ќе трае до 16 август, а ќе може да се врши секој ден во периодот од 8.30 до 19 часот. Оние кои во предвидениот рок нема да се пријават, ќе бидат избришани од електронскиот список.
Списокот со спорни гласачи ќе биде објавен и на страниците на дипломатско конзуларните претставништа за македонските државјани во странство.
Ваквите рокови дадени од ДИК, следуваат откако партиите потписнички на Пржинскиот договор одлучија за измени во Изборниот Законик.
Според партискиот договор, во делот за Избирачкиот список, три или повеќе члена на ДИК можат да побараат дополнителна проверка за било кое име.
Во таков случај, тие членови можат да побараат личноста да се појави лично ако живее во земјата или преку видеоконференција ако живеат во странство. Овие проверки ќе траат дополнителни 10 дена по 25-дневниот период.
Според независната пратеничка Солза Грчева, вакви решенија се „плукни – залепи“, а партиите се ставаат пред сите институции во државата.
Измените во Изборниот законик се изгласаа во Собранието со мнозинство, а независната пратеничка Солза Грчева од говорницата порача дека ваквите решенија се „плукни – залепи“, а партиите се ставаат пред сите институции во државата.
– „Тресла се гора, родио се миш“. Доаѓаат летни одмори, август месец, кој во август, како може практично да направи активна регистрација? Баба Зумбула ќе ја викаат од нива да проверат дали е на список? Па тоа е смешно, тоа е трагично. Како си замислувате дека овие луѓе ќе бидат цело лето на штрек? Јас овие граѓани ги повикувам на Скајп ако се пријавуваат да се маскираат. Па ова е смешно, го нема никаде, кој ќе потврди дека сум ја навистина преку Скајп ве молам. Ваков мајтап нема во цел свет. Бројката е смешна. Ги повикувам овие граѓани, доколку ги нема на Избирачкито список да ги тужат партиите. Бидејќи партиите се ДИК, партиите се државата. Како може МВР да не знае каде живеат граѓаните?, рече Грчева.