Многу сомнежи отвори намерата на Јавното претпријатие Комунална хигиена да ги трампа своите деловни простории во центарот на Скопје со зградата на поранешен ФАС 11 октомври.
Извори на НОВАТВ велат дека огласот не само што бил креиран за фирмата Унитајарс Стил Импекс на бизнисменот Славе Распашковски да биде одбрана на повикот за размена на простории, туку целата зделка е во комплетна спротивност на интересите на јавното претпријатие. Не само што не е во ќар, туку градското претпријатие ќе има дополнителни трошоци по оваа бизнис зделка.
„Комунална хигиена нема база за возилата и со години истата ја изнајмува од Распашковски. Наместо сега да издвојат пари за купување на база, му ја купуваат старата зграда на Распашковски, демек била блиску до базата и тоа им одговарало. Базата не ја купуваат, туку останува негова за утре да ја понуди на Комунална хигиена за огромна цена, кога ќе реши Управниот одбор да ја купи.“, вели изворот на НОВА.
Апсурдот, вели нашиот извор, е што базата каде Комунална хигиена ги чува камионите воопшто не влегла во договорот. Тие и понатаму ќе плаќаат кирија за возилата.
„Ним им треба база за возила, а тие купуваат административни простории“, вели изворот.
Како што објави вчера НОВА, Управниот одбор на Комунална хигиена на 22 јули донел одлука за размена на деловни простории со фирмата Унитајарс Стил Импекс. Јавното претпријатие на Распашковски му дава имот во Центар, а тој ја отстапува старата управна зграда на поранешната фабрика за автобуси ФАС 11 октомври.
Просториите на Комунална хигиена во строгиот центар на Скопје се проценети на 1.561.950 евра или по 1147 евра по метар квадратен. Додека зградата на фирмата Унитајарс Стил Импекс на бизнисменот Славе Распашковски во општина Гази Баба е проценета на 4.939.104 евра или по 915 евра за метар квадратен. Разликата меѓу овие две суми, или 3.377.000 евра, Комунална хигиена ќе му ја доплати на Распашковски.
Договорот ќе стане правосилен кога ќе помине на седница на Советот на Град Скопје. Оваа точка е ставена на дневен ред на утрешната седница на Советот.
Кој стави параф на договорот?
Од Комунална хигиена и денеска не одговорија на прашањата на НОВА, за тоа дали имало јавен повик за размена на простории, зошто е одбрана токму фирмата Унитајарс, дали е реална проценката на нивниот имот и која е економската логика за бизнис зделката.
Директорот на Комунална хигиена, Ракип Дочи, кадар на ДУИ, одбива да зборува за овој потег на јавното претпријатие.
На чело на Управниот одбор кој ја донел одлуката за договорот е Наташа Гребенарова Теофиловска, член на ВМРО ДПМНЕ и вработена во Државниот инспекторат за градежништво и урбанизам. НОВА ја контактираше и оваа госпоѓа, но ни таа не сакаше да зборува.
Претседател на Надзорниот одбор е Мите Костов, а во него е член и Јовица Латиновски, син на градоначалникот на Бутел, Петре Латиновски, кој беше претседател на Градски комитет на ВМРО-ДПМНЕ Скопје на Унијата на млади сили.
Кои ќе бидат први комшии на Комунална хигиена?
Според документите од Катастар, другите објекти во кругот на ФАС 11 октомври, како и огромното земјиште, веќе се отуѓени. Сопственик на речиси целата фабрика, сосе објекти и земјиште е фирмата Комплекс Александрија од Скопје. Таа во ФАС поседува:
15000 м2 деловни објекти
8690 м2 дворно место
6293 м2 градежно изградено земјиште
12000 м2 земјиште под зграда
Компанијата Комплекс Александрија е всушност фирмата „Искра ММ“. До 2012 година сопственик на „Искра ММ“ беше фирмата „Базики лимитед“ од Белизе, која се наоѓа на истата адреса каде е лоцирано и седиштето на провладиниот портал „Република“.
По многуте промени на сопствеништвата во оф-шор држави, сега сопственик на Александрија ДООЕЛ (од јануари 2016) е земјоделскиот комбинат Пелагонија АД Битола. Како членови на неизвршниот одбор на директори во ЗК Пелагонија се јавуваат бизнисменот Орце Камчев, заедно со директорот на оф-шор компанијата „Ексико“ – Тодор Мирчевски, како и бизнисменот Цветан Панделески, татко на Дејан Панделески, кумашинот на поранешниот министер за транспорт и врски, Миле Јанакиески.
Зошто токму ФАС 11 октомври?
Бизнисменот Славе Распашковски во 2003 година ја купи фабриката „ФАС 11 Октомври“. Фабриката беше задолжена и во лоша состојба, а Распашковски направи неколку неуспешни обиди за да ја рестартира и да го зголеми производството на автобусите.
Но ЈСП и Владата одлучи од Кина да го купува новиот возен парк, со што ја закопаа судбината на оваа фабрика. Работниците останаа без работа, а на Распашковски му остана и кредит од 5,5 милиони евра кон Стопанска банка – Битола по што почна да се распродава имотот на „ФАС 11 Октомври“ откако се активираше хипотеката. Првите лицитации беа неуспешни.
Според деталниот урбанистички план „Ќерамидница 1“на местото на оваа фабрика предвидено е изградба на големи трговски единици, а се планира и пат кој преку „Ќерамидница“ ќе води до населбата Аеродром.
Освен деловни единици, за овој простор кај Ќерамидница е предвидена и изградба на станбени објекти. Општината од ова место кога го менуваше ДУП-от најавуваше развој и нова скопска елитна населба. Со оглед на фактот што градот Скопје овде ќе гради пат кој ќе ги поврзе Аеродром и Центар, како и тоа дека населбата, иако сега запоставена, е на добра локација и речиси до центарот на Скопје, бизнис интересите на многумина да се дограбат до просториите на ФАС не се зачудувачки.