Невладината ЦИВИЛ информира за нерегуларности уште на самиот старт на гласањето. Во соопштението се вели:
“Прегласувањето на вториот круг во избирачките места во општина Центар започна со нерегуларности, односно со прекршување на изборниот молк, но и со уникатен обид за манипулирање со гласачите.
Во текот на минатата ноќ или рано утрово, флаери и писма се оставени во поштенските сандачиња и во влезовите на зградите насекаде низ општината каде што има прегласување, меѓу другите и во зградата во која се сместени канцелариите на Цивил.
Во едниот флаер и во писмото, од кое јасно се гледа дека е фалсификувано (кое наводно го пратил другиот кандидат за градоначалник) гласачите се повикуваат да излезат на гласање на 28 април, односно не денеска туку идната недела, а во другиот флаер граѓанките и граѓаните се повикуваат да не излезат на гласање, затоа што ако излезат ќе победел кандидатот од партијата која што, пак ќе речеме, очигледно ги фабрикувала флаерите и писмото.
Мораме да забележиме дека ваква инвентивност во обидот за фалсификување, односно замајување на гласачите на избори веројатно не е забележано до сега, така што Македонија уште еднаш станува пример за изборни манипулации.
Цивил ги поседува овие документи и ќе ги објави по завршувањето на изборниот молк, вечерва на прес-конференција, чие време на одржување дополнително ќе го соопштиме.
Дежурните телефонски линии на Цивил 02 / 520 91 76 и 076 / 902 103 се активни од 7.30 часот утрово на кои ги очекуваме сите граѓан(к)и да пријават и најмало сомневање за изборни нерегуларности. Набљудувачите, мобилните тимови и активистите на Цивил се распоредени на сите гласачки места на кои се прегласува денеска.”, се вели во информацијата на невладината ЦИВИЛ.