Оливер Андонов е предложен од Владата за министер за внатрешни работи, за да може да биде назначен досегашниот министер Митко Чавков за директор на Бирото за јавна безбедност. Вака, како технички потег, ја објаснуваат одлуката на Владата да го именува Андонов за министер на еден ден, познавачите на проблематика, цитирајќи го всушност Законот за полиција.
„Владата го избира директорот на Бирото за јавна безбедност на предлог на министерот за Внатрешни работи. За да биде именуван Чавков за директор на БЈБ мора да има министер кој ќе го предложи“ објаснуваат извори за НОВА, упатени во проблематиката.
Согласно законот за полиција, министерот за внатрешни работи предлага директор на Бирото, а владата го именува.
Во текот на денот Собранието ќе одржи седница на која ќе биде констатирана оставката на Митко Чавков и на која ќе се гласа за предлогот за избор на Оливер Андонов за нов министер за внатрешни работи.
Портпаролот на Владата, Александар Ѓорѓиев не сакаше да го објасни потегот на Владата, само рече дека нема ништо повеќе да додаде од тоа што го изјави претходно, односно „дека се очекува премиерот Емил Димитриев да го предложи Митко Чавков за нов директор на Бирото за јавна безбедност во МВР“.
Тој потврди дека претпладнето Владата имала седница на која по нивно лично барање се разрешени досегашните директори на Бирото за јавна безбедност и Управата за безбедност и контраразузнавање, Горанче Савовски и Љупчо Андоновски.
Кога ќе се формира нова преодна Влада, каде на министерското место се враќа Оливер Спасовски од СДСМ, Оливер Андонов ќе биде дополнителен заменик министер за внатрешни работи.
Оливер Андонов е член на ГДОМ, и до неодамна професор на МИТ, кој после извесно време доби отказ од овој Универзитет, заради непочитување на работните односи.
Новата преодна Влада ќе започне да функционира од сабота.