Според портпаролот на СДСМ, Петре Шилегов, на точно месец од поплавите во Стајковци, Сингилиќ, Арачиново и околината , се уште нема конечен биланс на жртвите за кои до денес според МВР се најмалку 23.
– Ниту една институција не ги отфрли неофицијалните информации за неколку пати поголема бројка на загинати. Не се знае бројката на исчезнати. Граѓаните се уште не можат да си го вратат животот во нормала. Еднократната парична помош за семејствата на загинатите се уште не е исплатена, а голем дел од поплавените граѓани не го имаат добиено ветениот аванс, изјави Шилегов.
Како што вели тој, со поплавите испливала на виделина неодговорноста и неспособноста на власта на Никола Груевски и Коце Трајановски во најсуровата форма – со ужасни последици.
– За невремето не предупреди ниту една од државните институции. Обиколницата кај Стајковци кобната вечер не беше затворена за сообраќај. Затоа многу граѓани останаа заробени во своите возила без помош, затоа имаше загинати. Следните денови единствено функционираше Ајфонот на Груевски кој замислуваше дека глуми во реалити шоу, потенцира портпаролот на СДСМ.
Тој нотира дека не бил испочитуван ниту Протоколот на ИНТЕРПОЛ за идентификација на жртви настрадани во катастрофа, со земање отпечатоци и ДНК анализа.
– Потфрлија институциите што ние граѓаните ги плаќаме за да не штитат. Затоа, одговорност мора да има и ќе има, порача Шилегов.
На прашање на граѓанин за тоа до каде се парите, Шилегов вели токму поради тоа ги повикал и камерите на медиумите за да им кажат на граѓаните на Стајковци дека проценката не е завршена и пари нема.
– Паричните средства Владата треба да ги префрли и авансите и за неповратната помош, но во голем дел парите не се префрлени. Денес баш затоа сум тука да укажеме на заспаните да ги разбудиме. Конечно да почнат да ја работа својата работа, а не да лажат пред телевизија. Факт е дека тука не е во ред, порача портпаролот на СДСМ.