Најмалку 12 полицајци се повредени во нередите во американската сојузна држава Северна Каролина откако полицаец уби маж од афроамериканско потекло.
Протестите избија откако полицаец вчера застрела маж во станбен комплекс во Шарлот. Полицијата соопшти дека убиениот бил вооружен и претставувал закана.
Неколку десетици демонстранти го блокираа автопатот поставувајќи возила и палејќи огнови. Претходно тие се собраа на местото на инцидентот и фрлале со камења кон полицајците, и демолирајќи полициски возила, а полицијата употребила солзавец за да ги растера.
Портпаролот на полицијата изјавил дека во комплексот влегле со налог за апсење на еден осомничен, кога здогледале маж во автомобил, но тој не бил осомничениот по кого трагале.
Тој излегол од автомобилот со пиштол, по што полицијата пукала.
Мажот е идентификуван како Кит Лајмон Скот (43), кој бил пренесен во болница каде била констатирана смрт.
Полицаецот кој го застрелал е пратен на административно отсуство што е стандардна процедура во вакви случаи.
Протестите во Шарлот следат само неколку часа откако полицијата во градот Талса во Оклахома уби невооружен маж, исто така од афроамериканско потекло.